Բարաք Օբաման մեկնաբանել է մարտի 26-ին Սեուլում Ռուսաստանի նախկին նախագահ Դմիտրի Մեդվեդևի հետ տեղի ունեցած խոսակցությունը, որը հանրության սեփականությունն է դարձել միացված բարձրախոսի շնորհիվ: Այդ ժամանակ Օբաման խնդրել էր փոխանցել Վլադիմիր Պուտինին, որ ԱՄՆ նախագահական ընտրություններից հետո նա գործողությունների ավելի մեծ տարածք կունենա:
KRNV հեռուստաալիքին տված հարցազրույցի ժամանակ Օբաման բացատրել է, որ խոսքը միջուկային անվտանգության ապահովման մասին էր. «Խոսքն այն մասին էր, թե ինչպես ենք մենք վերաբերվում Ռուսաստանին և միջուկային զենքին, ինչպես նաև պայմանավորվածության մասին, որի շրջանակներում կրճատվել են միջուկային զենքերի քանակը թե՛ Ռուսաստանում, թե՛ ԱՄՆ-ում: Այս գործողությունները հավանության են արժանացել Սենատում երկու կուսակցությունների կողմից էլ»:
«Բանավեճը հիմնականում վերաբերում էր այն փաստին, որ դժվար է լրացուցիչ բանակցություններ վարել մի իրավիճակում, երբ ես զբաղվում եմ նախընտրական քարոզարշավով և նմանատիպ գործերով, իսկ պարոն Պուտինը, ով հենց նոր է վերընտրվել, նոր կառավարություն է ձևավորում: Երբ ինչ-որ հարցի շուրջ բանակցություններ են ընթանում, պետք է վստահ լինել, որ բոլորը կենտրոնացած են դրա վրա», –ասել է նախագահը:
Օբաման ընդգծել է նաև միջուկային անվտանգության ոլորտում աշխատանքների շարունակման անհրաժեշտությունը և ավելացրել, որ իր համար կարևոր է, որ Իրանը նմանատիպ զենք ձեռք չբերի:
KRNV-ի լրագրողները խնդրել են Միթ Ռոմնիի մամլո քարտուղար Անդրեա Սոլին մեկնաբանել Օբամայի պատասխանը: Սոլը նկատել է, որ «նահանգապետ Ռոմնին կենտրոնացած է ԱՄՆ-ի անվտանգության ապահովման հարցի վրա, իսկ Օբաման՝ ընտրություններում հաղթելու»:
Նա մեղադրել է նախագահին ամերիկացիների թիկունքում գործելու մեջ: Սոլը, հիշեցնելով, որ մի անգամ էլ միացրած բարձրախոսով Բարաք Օբաման բացասական էր արտահայտվել Իսրայելի վարչապետ Բենիամին Նեթանյահուի մասին, ավելացրել է. «Մենք կարիք ունենք այնպիսի նախագահի, ով անկեղծ կլինի մեր դաշնակիցների հետ, և ցույց կտա մեր հակառակորդներին, որ լուրջ բարեփոխումների կարիք կա»:
