«Եվրոպան Հունաստանի տնտեսությանը նոր պահանջներ չպետք է ներկայացնի»,– կիրակի օրը հայտարարել է Հունաստանի նախագահ Կարոլոս Պապուլիասը:
«Չի կարելի այս ժողովրդից ավելին պահանջել, առանց այն էլ նա ամեն ինչ արդեն տվել է»,- ասել է Պապուլիասը Սալոնիկում՝ Հունաստանի ազգային տոնին նվիրված ռազմական շքերթից հետո տեղեկան հեռուստաալիքներից մեկին տված հարցազրույցի ժամանակ:
Հունական կառավարությունը հաջորդ շաբաթ կքննարկի խնայողության միջոցների մինչև 14 միլիարդ եվրո ծավալով փաթեթը, որի փոխարեն երկիրը հույս ունի ԵՄ–ի և ԱՄՀ–ի կողմից ստանալ վարկի հերթական՝ 31.5 միլիարդ տրանշը: Նախատեսվում է կրկին կրճատել պետական ծառայողների աշխատավարձերը և թոշակները, աշխատանքից հեռացնել պետական համակարգի հազարավոր ծառայողների:
Պապուլիասի խոսքերով՝ Եվրոպայում արդեն սկսել են խոստովանել, որ Հունաստանն «ավելիին է հասել», քան մյուս երկրները, այդ թվում՝ Իռլանդիան, Պորտուգալիան, որոնք այժմ խնայողության միջոցներ են իրականացնում։
«Ես հույս ունեմ, որ հաջորդ ամիսները մեր ժողովրդին կհուսադրեն, որ մենք արդեն հաղթահարել ենք ճգնաժամը»,- իր խոսքը եզրափակել է Պապուլիասը:
