Ադրբեջանական salamnews.org լրատվական կայքը, վկայակոչելով ԱՄՆ Պետդեպարտամենտի կայքը, նշում է, որ ԱՄՆ պետքարտուղարի Եվրոպայի ու Եվրասիայի հարցերով տեղակալ Ֆիլիպ Գորդոնն անդրադարձել է ղարաբաղյան հակամարտության կարգավորման հարցում ԱՄՆ ներդրմանը.
«Մենք կուժեղացնենք ԵԱՀԿ Մինսկի խմբի հետ մեր համագործակցությունը, որպեսզի դրանով իսկ օգնենք Հայաստանին ու Ադրբեջանին` ղարաբաղյան հիմնախնդրի խաղաղ կարգավորման համար: Բացի այդ, մենք շարունակում ենք աջակցել հայ-թուրքական հարաբերությունների կարգավորմանը: Ինչ վերաբերում է Վրաստանին, ապա մենք կշարունակենք աջակցել նրա տարածքային ամբողջականությանն ու ինքնիշխանությանը միջազգային հանրության կողմից ճանաչված սահմաններում:
ԱՄՆ-ը կտրականապես աջակցում է ԵՄ-ի «Արևելյան գործընկերություն» ձևաչափին, որում ներառված են Ուկրաինան, Բելառուսը, Մոլդովան և Հարավային Կովկասի երեք երկրները: Մենք կարծում ենք, որ ԱՄՆ-ը և ԵՄ-ը պետք է համատեղ աշխատեն Եվրոպայում հետագա հակամարտությունների առաջացումից խուսափելու համար և նպաստեն այդ երկրներում ժողովրդավարության զարգացմանը»:
Հիշեցնենք, որ այս տարվա հունվարի կեսերին ռուս փորձագետ, Կովկասի խնդիրների կենտրոնի գիտաշխատող Նիկոլայ Սիլաևն ադրբեջանական լրատվամիջոցներին տված հարցազրույցում նշել էր, որ բանակցությունների տապալման հարցում առաջին հերթին իրենց մեղքն ունեն միջազգային միջնորդները, որոնք ամեն գնով ցանկանում են այդ բանակցությունները փաթաթել կողմերի վզին.
«Միևնույն ժամանակ խնդրի լուծման հարցում գոյություն չունեն տարաձայնություններ միջազգային միջնորդների` առաջին հերթին ԱՄՆ-ի ու Ռուսաստանի միջև: Երկու երկրների համար էլ անցանկալի է համարվում Ղարաբաղում պատերազմի վերսկսումը: Սակայն տարաձայնությունների բացակայությունը դեռ չի նշանակում, որ նրանք պատրաստ են համատեղ գործել: ԱՄՆ-ը վառ հետաքրքրություն չի ցուցաբերում Ղարաբաղի նկատմամբ: Դրա համար էլ ստեղծվել է այնպիսի իրավիճակ, որ վերջին շրջանում Մոսկվայի դերը մյուս միջնորդների համեմատ զգալիորեն աճել է:
Պատերազմի վերսկսման դեպքում եթե այն ընդգրկի նաև Հայաստանի տարածքը, ապա Ռուսաստանը կհայտնվի շատ անհարմար իրավիճակում, ինչի համար էլ Մոսկվան ամեն գնով պետք է խուսափի պատերազմի վերսկսումից: Եթե զինված բախումները սահմանափակվեն միայն Ղարաբաղի տարածքով, ապա Ռուսաստանը չի միջամտի, իսկ ահա եթե Ադրբեջանը ռազմական հարված հասցնի ՀԱՊԿ գծով Ռուսաստանի դաշնակից Հայաստանին, ապա դա արդեն լրիվ այլ բան է»:
