Թուրքիայի արտգործնախարար Ահմեդ Դավութօղլուն կիրակի օրը հայտարարել է, որ Թուրքիան հանդես չի գա ընդդեմ անվտանգության այն միջոցառումների, որոնք Հյուսիսատլանտյան դաշինքը հարմար է համարում իրականացնել: Դա, նրա խոսքերով, «բացառված է»: Դրանով Թուրքիան, հավանաբար, հրաժարվում է բոլոր տեսակի գործողություններից, որոնք կարող էին արգելափակել հակահրթիռային վահանի ստեղծումը, որն առաջարկում է Միացյալ Նահանգներն այս դաշինքին:
Դավութօղլուն ներկայացրել է այն երեք սկզբունքները, որոնց ՆԱՏՕ-ի անդամ Թուրքիան պատրաստվում է հետեւել` հակահրթիռային վահանի վերաբերյալ իր դիրքորոշումը ներկայացնելիս: Այս մասին Թուրքիայի արտգործնախարարը խոսել է Չինաստան կատարած այցելության ժամանակ:
ՆԱՏՕ-ի անդամ երկրները կհավաքվեն Լիսաբոնում այս տարվա նոյեմբերի 19-ին` քննարկելու համար այս հարցը: Քանի որ բոլոր որոշումներն այդ կազմակերպությունում ընդունվում են կոնսենսուսով, ապա անհրաժեշտ է բոլորի հետ համաձայնեցնել նրանց դիրքորոշումը:
«ՆԱՏՕ-ն պետք է հաշվի առնի անդամ բոլոր երկրների անվտանգության խնդիրները (հետեւաբար` Թուրքիայի համար անընդունելի կլինի, եթե ինչ-որ երկրներ դուրս մնան այս համակարգից»,- ասել է նա` դրանով իսկ հաստատելով, որ Թուրքիան պահանջում է, որպեսզի Թուրքիայի ամբողջ տարածքի անվտանգությունն ապահովվի:
Ըստ դիվանագետների` հակահրթիռային համակարգի տեղադրման համար Թուրքիան նախընտրելի, բայց ոչ միակ երկիրն է: Այն սահմանակից է Իրանին, այդ իսկ պատճառով նրա թեկնածությունը հետաքրքրություն է առաջացրել:
Ըստ Դավութօղլուի` նա չի պատրաստվում դառնալ ճակատային երկիր, ինչպես դա սառը պատերազմի ժամանակ էր: «Մենք վտանգ չենք տեսնում, որը կարող էր գալ հարակից տարածաշրջաններից` ներառյալ Իրանը, Ռուսաստանը եւ Սիրիան, ինչպես նաեւ մեր մյուս հարեւանները»,- ասել է Դավութօղլուն: Ըստ նախարարի` ՆԱՏՕ-ն պետք է բացառի Թուրքիայի հակադրումը ինչ-որ երկրների. «Մենք չենք ցանկանում, որպեսզի մեր շուրջը ձեւավորվի գոտի կամ սառը պատերազմի հոգեբանություն»:
