Այսօր` հոկտեմբերի 26-ին տեղի է ունեցել ՀՀԿ գործադիր մարմնի նիստ, որը վարել է ՀՀԿ նախագահ Սերժ Սարգսյանը:
Նիստի ավարտին ԱԺ փոխնախագահ, ՀՀԿ մամուլի քարտուղար Էդուարդ Շարմազանովը լրագրողների հետ զրույցում տեղեկացրել է, որ ՀՀԿ-ի արտահերթ համագումարը տեղի կունենա դեկտեմբերի 15-ին, հաստատվել է նաեւ ՀՀԿ համագումարի օրակարգը եւ օրակարգում լինելու է Սերժ Սարգսյանի առաջադրման հարցը: Նիստի ընթացքում քննարկվել են այդ համագումարի կազմակերպչական հարցերը:
Էդուարդ Շարմազանովը նշել է, որ ՀՀԿ-ի օրակարգում վարչապետի փոփոխության հարց չի քննարկվել և չի քննարկվելու:
Արձագանքելով մամուլում տեղ գտած տեղեկություններին, թե ՀՀԿ-ն ԲՀԿ առաջնորդ Գագիկ Ծառուկյանին փոխվարչապետի պաշտոն է խոստացել, նա ասել է, որ այդ խոսակցություններն իրականությանը չեն համապատասխանում:
Ինչ վերաբերում է երկու կուսակցությունների՝ ՀՀԿ-ի և ԲՀԿ-ի առաջնորդների հանդիպումներին, Շարմազանովն ընդգծել է, որ նրանք կարող են հանդիպել և կհանդիպեն, բայց պետք չէ այդ հանդիպումներից զարմանալ, որովհետեւ Գագիկ Ծառուկյանը Ազգային անվտանգության խորհրդի անդամ է, Օլիմպական կոմիտեի ղեկավարը, հետևաբար բնական է, որ կլինեն հանդիպումներ:
