Վիեննայի դատարանը իր նախկին աշխատավայրից` բանկից գողություն կատարած տղամարդուն է վերադարձրել նրա կողմից գողացված գումարները: Այս մասին հայտնում է DiePresse.com-ը: Համապատասխան որոշում է կայացվել հոկտեմբերի 25-ին: Պարզաբանումները` ինչպե՞ս վարվել այդ գումարի հետ, տևել են 2012-ի մարտից հոկտեմբեր:
Խոսքը 1993 թվականին կատարված հանցագործության մասին է: Այդ ժամանակ վիեննական բանկի աշխատակից Օտտո Նյումանը ֆինանսական հաստատության կողոպուտ էր կազմակերպել իր երկու գործընկերների հետ: Բանկից նրանք դուրս էին բերել 2,3 մլն շիլինգ (167 հազար եվրո), ինչպես նաև ոսկե ձուլակտորներ և մետաղադրամներ:
Հետաքննության ընթացքում հաջողվել է հայտնաբերել միայն գումարի մի մասը, մնացածն ավելի ուշ Նյումանն անձամբ է վերադարձրել դատարան: Գումարները պահպանման նպատակով փոխանցվել էին Ավստրիայի Արդարադատության նախարարությանը: Մինչ օրս այդ գումարը հետ չի ուզել ո´չ բանկը, ո´չ էլ ֆինանսական հաստատության հետ 19 տարի առաջ աշխատած ապահովագրական ընկերությունը:
2012-ի գարնանը դատարանը փորձել է կարգավորել հարցը՝ կապված չպահանջված գումարի հետ և եկել եզրակացության, որ դրանք պետք է վերադարձնել նախկին ամբաստանյալին: Նա դատապարտվել էր 7 տարվա ազատազրկման, սակայն 3,5 տարի անց վաղաժամ ազատ էր արձակվել: Պարզվել է, որ բանկը գումարը ստացել է ապահովագրությամբ: Ապահովագրական ընկերությանն է վերադարձվել ոսկին, որն ըստ բանկի հետ պայմանագրի պատկանում էր հենց ֆիրմային, իսկ 1993 թվականին դրա գինը բարձրացել է:
Այդ ժամանակ դատարանը կապվել է Նյումանի նախկին փաստաբանի հետ և կարգադրել գումարը փոխանցել նախկին հաճախորդին: Փաստաբանը, չհավատալով իրադարձությունների նման զարգացմանը, անձամբ է զանգահարել բանկ և ապահովագրական ընկերություն ու պարզել, որ ո´չ մեկը , ո´չ էլ մյուսը իսկապես հավակնություններ չունեն գումարի նկատմամբ:
Արդյունքում Նյումանի հաշվին է փոխանցվել 63 հազար եվրո: Փաստաբանը նշել է, որ հաճախորդը շատ է զարմացել նման որոշումից, սակայն գումարից չի հրաժարվել:
