Լատվիայի նախագահ Վալդիս Զատլերսի հրավերով Նոր Նախիջևանի և Ռուսաստանի Հայոց թեմի առաջնորդ Գերաշնորհ Տ. Եզրաս եպիսկոպոս Ներսիսյանը մարտի 9-ին մեկնեց Ռիգա` մասնակցելու Լատվիայի և Հայաստանի նախագահների հետ հանդիպմանն ու պաշտոնական ճաշկերույթին:
Մինչ պաշտոնական հանդիպումը Սրբազան հայրը Ռիգայի նորակառույց Ս. Գրիգոր Լուսավորիչ եկեղեցում հանդիպեց հայ համայնքի հետ, մասնակցեց հոգևոր ժողովին, որտեղ քննարկվեցին նորակառույց եկեղեցու օծման, եկեղեցու հովանու ներքո գործող կիրակնօրյա դպրոցի գործունեության և համայնքային կյանքի աշխուժացման հետ կապված հարցեր: Հանդիպման եկած բազմաթիվ հայ հավատացյալներին Սրբազան հայրն իր օրհնությունը բաշխեց` հորդորելով ապրել եկեղեցու շուրջ համախմբված, քրիստոնեական այն արժեքներով, որոնցով ապրել ու արարել են մեր նախնիները:
Երեկոյան Սրբազան հայրը մասնակցեց երկու նախագահների և պաշտոնական այրերի հետ հանդիպմանն ու ճաշկերույթին:
Հաջորդ օրը Նոր Նախիջևանի և Ռուսաստանի Հայոց թեմի առաջնորդ Տ. Եզրաս եպիսկոպոս Ներսիսյանը, համայնքի հոգևոր հովիվ Տ. Խոսրով քահանա Ստեփանյանի, բարերարների, ծխական խորհրդի անդամների, բարեպաշտ հավատացյալների հետ Սբ. Գր.Լուսավորիչ եկեղեցում դիմավորեց ՀՀ նախագահ Սերժ Սարգսյանին և պատվիրակության մյուս անդամներին: Եկեղեցում համատեղ գոհաբանական աղոթք կատարվեց: Սրբազան հայրը ողջունեց նախագահին և նրան ուղեկցող պետական այրերին, ապա հավատացյալներին իր խոսքն ասաց նախագահ Սերժ Սարգսյանը: Խոսելով համայնքի մասին` նախագահը հիշեց, որ իր նախարարության տարիներին Ռիգայում եկեղեցու շինարարական աշխատանքները դեռ ավարտված չէին, իսկ այսօր, շնորհիվ ռուսահայոց առաջնորդ Տ.Եզրաս եպիսկոպոս Ներսիսյանի ջանքերի, ոչ միայն կանգուն է եկեղեցին, այլև ձևավորվել է եկեղեցասեր, համերաշխ համայնք: Նախագահ Սերժ Սարգսյանը Ռիգայի Սբ. Գր.Լուսավորիչ եկեղեցուն նվիրեց քարե մանր կտորներով և յուղաներկով պատրաստված «Թուղթ խաչքար»:
Հյուրերին աղ ու հացով դիմավորած կիրակնօրյայի սաները արտասանեցին ու երգեցին հայրենիքի մասին երգեր: Տ. Եզրաս եպիսկոպոս Ներսիսյանը սաներին հորդորեց նախանձախնդիր լինել հայերենի իմացության և պահպանության գործում, սիրել Հայոց Եկեղեցին, լինել հայրենիքի և Սբ. Էջմիածնի արժանավոր զավակը:
Մարտի 10-ին Եզրաս Սրբազանը վերադարձավ Մոսկվա:
Նոր Նախիջևանի և Ռուսաստանի
Հայոց թեմի մամլո դիվան
