ԲՀԿ-ին կոալիցիոն հուշագրի մասին է հիշեցրել նաև վարչապետ Տիգրան Սարգսյանը` նախօրեին Ազգային ժողովում պատասխանելով լրագրողների հարցերին:
Սա, անշուշտ, արդեն այլ մակարդակ է, քան Շարմազանովը կամ Գալուստ Սահակյանը, և եթե սովորաբար բավական զգույշ և նրբանկատ Տիգրան Սարգսյանն է «Բարգավաճ Հայաստան»-ին հիշեցնում 2011 թվականի կոալիցիոն հուշագրի մասին, այստեղ ուրեմն խնդիրը Սերժ Սարգսյանի օրակարգում շատ ավելի հիմնարար է դրված, քան կարող էր թվալ: Այսինքն` խնդիրը այստեղ մի քիչ ավելին է, քան զուտ քարոզչական էֆեկտը:
Հանրության զգալի մասին սա հիմք է տալիս պնդելու, որ Սերժ Սարգսյանը Գագիկ Ծառուկյանին փորձում է պարտադրել աջակցություն նախագահական ընտրություններում: Սակայն ամեն ինչ այնքան էլ պարզունակ չէ, որքան թվում է:
Գագիկ Ծառուկյանին այս հիշեցումներն իրականում պայմանավորված չեն նրանով, որ Սարգսյանը Ծառուկյանին փորձում է պարտադրել սատարել իրեն նախագահական ընտրություններում: Այստեղ խնդիրն այն է, որ Գագիկ Ծառուկյանը ստիպված լինի հրապարակավ հրաժարվել կոալիցիոն հուշագրից: Առայժմ Ծառուկյանը չի անում այդ բանը, այսինքն` նրա փոխարեն առայժմ նրա մանկլավիկները և ԲՀԿ-ի այլ դեմքեր են խոսում: Իսկ ԲՀԿ-ում, իհարկե, գնահատում են միայն պաշտոնական խոսքը, համենայնդեպս` այլ կուսակցությունների և ուժերի պարագայում:
Եվ ուրեմն ԲՀԿ-ի պարագայում էլ մանկլավիկների կամ կուսակցական այլ ֆունկցիոներների խոսքը, այսես ասած, «հաշիվ չէ»: Քանի դեռ Ծառուկյանը չի հրաժարվել, կնշանակի` ԲՀԿ-ն դեռևս ստորագրում է Սերժ Սարգսյանին սատարելու տակ: Իսկ Սերժ Սարգսյանին այդ սատարումը պետք չէ: Սերժ Սարգսյանին պետք է, որ Ծառուկյանը հրաժարվի ստորագրությունից: Դրանով պարզ կերևա, թե ինչքանով է Ծառուկյանի խոսքը գործ:
Այսինքն` այսօր էլ երևում է, երբ մարդը մեկ տարի առաջ ստորագրում է սատարման մասին ինչ-որ թուղթ, իսկ հետո սկսում է հանդես գալ, այսպես, ասած, ընդդիմության դիրքերից:
Այսինքն` ԲՀԿ առաջնորդը վաղուց է ցույց տվել, որ խոսքը, մեղմ ասած, այնքան էլ գործ չէ: Սակայն զուտ ֆորմալ տեսանկյունից դա կերևա, երբ Ծառուկյանը հրաժարվի Սերժ Սարգսյանի համար ստորագրությունից:
Մյուս կողմից, սակայն, ՀՀԿ-ի ներկայիս հիշեցումները ըստ էության վկայում են նաև այդ մասին: Այսինքն` միգուցե մեծ հաշվով կարևոր էլ չէ ստորագրությունը մնո՞ւմ է, թե՞ ետ է կանչվում: Ծառուկյանին պարզապես անընդհատ հիշեցնում են հուշագրի մասին ընդամենը հենց այդ խոսքի ու գործի միֆը քանդելու և միևնույն ժամանակ` նաև ԲՀԿ առաջնորդին իշխանական համակարգի տրամաբանության մեջ վարկաբեկելու համար, քանի որ նա փաստորեն ոչ միայն հասարակության մոտ է կեղծում` իր խոսքի ու գործի միֆը կառուցելով, այլ նաև, ըստ էության, իշխանական համակարգի համար է դառնում անվստահելի, երբ ասում է մի բան, հետո այլ բան անում և ասում:
Գաղտնիք չէ, որ Սերժ Սարգսյանը իշխանական համակարգում չի վայելում լիակատար վստահություն: Սերժ Սարգսյանը ներկայումս փորձում է ցույց տալ, որ, այսպես ասած, իր հիմնական հակառակորդ դիտվող թևին այլևս վստահել չի լինի, և այդ թևն իրականում աչքի է ընկնում անկանխատեսելիությամբ, հետևաբար, մեղմ ասած, ռիսկային է նրա հետ որևէ հույս կամ պլան կապելը:
Դա Սերժ Սարգսյանը փորձում է անել նրանց համար, ովքեր իշխանության մեջ կարող էին կանգնած լինել երկընտրանքի առաջ:
