Անդրադառնալով շփման գծում հրադադարի խախտմանը՝ Շուշիի առանձնակի գումարտակի հրամանատար Ժիրայր Սեֆիլյանը մեզ հետ զրույցում ահազանգեց, որ այս ամենի մեջ մեծ վտանգ է տեսնում։ Կապված մեծ արևելքում տեղի ունեցող զարգացումների հետ, որոնք կարող են մեր տարածաշրջանում գերտերությունների նախկին պայմանավորվածությունների վերանայման պատճառ հանդիսանալ, մասնավորապես՝ Ռուսաստան-ԱՄՆ կամ Ռուսաստան-Արևմուտք հարաբերություններով։
«Հատկապես Լիբիայում այժմ տեղի ունեցող զարգացումների վերաբերյալ առկա է կոշտ տարակարծություն երկու այս բևեռների միջև։ Մենք ունենք տեղեկություն, որ Ռուսաստանը սպառնում է Արևմուտքին, որ եթե նրանք համարձակվեն ուժ կիրառել Լիբիայի նկատմամբ, հակաքայլը կլինի Ռուսաստանի զինուժի մուտքը Այսրկովկաս` նկատի ունեմ՝ Հարավային Կովկաս։ Եվ այս զորքերի տեղաբաշխումը լինելու է «խաղաղապահ առաքելությամբ» Արցախի և Ադրբեջանի առկա սահմանային գծում։ Այս սցենարը կարող է իրականանալ այդ գծում վերջին ամիսներին տեղի ունեցող աշխուժ փոխհրաձգության պատճառով կամ կարճաժամկետ պատերազմի վերսկսման պատճառով»,- ահազանգեց Ժիրայր Սեֆիլյանը։
Այնուհետև, խոսքը ուղղելով Ռուսաստանի իշխանություններին` ավելացրեց. «Եթե նրանք այն կարծիքին են, թե Սերժ Սարգսյանի հետ որևէ համաձայնության կամ պարտադրանքի միջոցով կարող են իրականցանել այսպիսի հրեշավոր ծրագիր, ապա չարաչար սխալվում են։ Վստահեցնում եմ նրանց, որ այսօր ՀՀ-ում և Արցախում առկա է բավարար հայ մարդկանց ներուժ, որոնք կդիմադրեն այս ծրագրի իրականացման»։