Սերժ Սարգսյանը մտադիր չէ պատժել ՀՀԿ կազմակերպչական վարչության նախագահ Ռուբեն Թադևոսյանին` Սերոբ Բոզոյանից դյուրավառ գազով լցված փուչիկներ գնելու (տեղեկացված լինելով, որ դրանք պայթյունավտանգ են) և այդպիսով` հարյուրավոր երիտասարդների կյանքն ու առողջությունը վտանգի տակ դնելու համար: Ըստ «Հայկական ժամանակ»-ի` ավելին, Հանրապետության հրապարակում փուչիկների չարաբաստիկ պայթյունի օրվանից մինչ օրս ՀՀԿ նախագահ Ս. Սարգսյանը խորհրդի նիստերից որևէ մեկի ժամանակ չի բարձրացրել այդ հարցը և որևէ մեկին, թեկուզ բանավոր, պատասխանատվության չի ենթարկել:
«ՀԺ»-ն այսպիսի եզրակացության է բխում Սարգսյանի խոսնակ Ա. Արզումանյանին և ՀՀԿ խոսնակ է. Շարմազանովին իր թղթակցի հղած հարցումների պատասխաններից: Վերջին շրջանում հանրությունը հաճախ է էկրաններին տեսնում Սերժ Սարգսյանի խրոխտ դեմքը, մեկին ասում է՝ սիրուն չի, մյուսին ասում է` խայտառակություն, երրորդին ասում է` ի՞նչ է սա նշանակում և այսպես շարունակ: Փաստորեն, կադրերը, թե ինչպես են հարյուրավոր երիտասարդներ այրվելով այսուայնկողմ փախչում, Սերժ Սարգսյանի համար սիրուն կադրեր էին, կատարվածն էլ խայտառակություն չէ:
