ՄԱԿ-ի Անվտանգության խորհուրդը կոչ է արել Սիրիայի իշխանություններին ու ապստամբների քառօրյա զինադադար կնքել ուրբաթ մեկնարկելիք իսլամական տոնի՝ Իդ ալ-Ադհայի ժամանակ: Այս մասին հայտնում է «Ազատություն» ռադիոկայանի ռուսական ծառայությունը:
Հայտարարությունը միաձայն ընդունվել է չորեքշաբթի: Ինչպես հայտնել է Սիրիայի հարցով միջազգային բանագնաց Լախդար Բրահիմին՝ զինադադարի գաղափարի հեղինակը, այսօր պաշտոնական Դամասկոսը պետք է հայտարարի՝ համաձա՞յն է արդյոք կրակի դադարեցմանը: Բրահիմիի խոսքերով՝ Սիրիայի իշխանությունների կողմից դրական արձագանքը շատ հավանական է թվում նաև ՄԱԿ-ում ՌԴ դեսպան Վիտալի Չուրկինին:
Ավելի վաղ Բրահիմին հայտարարել էր, որ զինված ընդդիմության տարբեր խմբեր, որոնց հետ իրեն հաջողվել է կապ հաստատել, նույնպես համաձայնել են կրակի դադարեցման առաջարկին:
Միջազգային բանագնացը նշել է, որ տոնին զինադադարի պայմանավորվածությունը կարող է հիմք դառնալ տևական ժամկետով զինդադարի մասին բանակցությունների համար:
