Հալեպի Սուրբ Գևորգ եկեղեցին սիրիական բանակի և ընդդիմադիրների սահմանագծային շրջանում է: Եկեղեցին հրդեհելու մասին խոսակցությունները չափազանցված են: Այս մասին այսօր «Առաջին լրատվական»-ի հետ զրույցում ասաց Բերիո Հայոց թեմի առաջնորդարանի բանբեր Ժիրայր Ռայիսյանը՝ անդրադառնալով երեկ տարածված տեղեկություններին, թե Հալեպի Սուրբ Գևորգ հայկական եկեղեցին է այրվել է:
Ըստ նրա՝ իրենք ևս երեկ լսել են նման լուրեր և ստուգել են: «Սուրբ Գևորգ եկեղեցին գտնվում է ընդդիմադիրների և սիրիական բանակի սահմանագծային շրջանում: Սուրբ Գևորգ եկեղեցին միտումնավոր ոչ ոք հրդեհի չի մատնել: Ճիշտ է միայն, որ ետևի պատերից մեկի մոտ բոց է եղել, որը եկեղեցու հետ որևէ առնչություն չունի: Երևի մարդիկ այդ բոցը տեսել են հեռվից և եզրակացրել են, որ հրկիզվել է Սուրբ Գևորգ եկեղեցին: Նախօրեին հրկիզվել էր հարևանությամբ գտնվող մայրապետների կենտրոնը, և ռումբի մի մասն ընկել էր եկեղեցու հարակից հատված»,- հստակեցրեց հալեպահայը:
Հակիրճ ներկայացնելով իրադրությունը Հալեպում՝ նա ասաց, որ Հալեպի հայաշատ «Նոր Գյուղ» թաղամասը շարունակում է ամայի մնալդիպուկահարների վտանգի առկայության պատճառով, բայց քաղաքի կենտրոնական հատվածներում կարծես թե հանդարտ է:
Անդրադառնալով սիրիահայերին աջակցող «Օգնիր եղբորդ» նախաձեռնության հումանիտար օգնության առաջին խմբաքանակի իրացմանը՝ Ռայիսյանն ասաց, որ, ինչպես և ծրագրված էր, այն բաժին հասավ ոչ միայն սիրիահայերին, այլև արաբներին:
«Օգնության 400 արկղը բաժանվել է Կարմիր խաչի օգնությամբ, 50-ական ծրար ուղարկվել է Սիրիայի երկու քաղաքների կարիքավորներին, 100 ծրար օգնություն բաժանել են Ազգային առաջնորդարանի ներկայացուցիչները, իսկ մնացածն ամբողջությամբ բաժանվել է կարիքավոր հայերին և արաբներին»,- մանրամասնեց Ժիրայր Ռայիսյանը:
