Հայաստանի Պահնորդների ասոցիացիան դժգոհ է «Մասնավոր պահնորդական գործունեության մասին» օրենքից: Այս մասին այսօր լրագրողների հետ հանդիպման ժամանակ ասաց ասոցիացիայի նախագահ Հովհաննես Պետրոսյանը:
Նա նշեց, որ ասոցիացիայի կազմում գտնվող կազմակերպությունները ոլորտում գործում են մոտ 10 տարի, մշտապես օրինական աշխատել են, մուծել են հարկերը, սակայն այսօր կանգնած են լիցենզիա չստանալու վտանգի առաջ: Հովհաննես Պետրոսյանի խոսքերով՝ այս տարվա փետրվարին օրենքն ընդունվեց շատ հրատապ կերպով, և ասոցիացիայի անդամների հետ քննարկումներ չեղան:
«Դեռ 2009 թվականին օրինագիծը դրվեց քննարկման, հրավիրեցին մեզ, մասնակցեցինք, ներկայացրեցինք այն խնդիրները, որոնք կարող են առաջ գալ, ու կասեցվեց օրենքի ընդունումը մինչև 2012 թվականը: Ինչո՞ւ 2012-ին ընդունվեց օրենքը և ինչո՞ւ այդքան թերություններով»,- հարցադրում է անում ասոցիացիայի նախագահը:
Նա նշեց, որ պատրաստել են առաջարկություններ, պատրաստվում են դրանք ներկայացնել ԱԺ՝ օրենքում փոփոխություններ ու լրացումներ կատարելու համար: Միայն ասոցիացիայի կազմում այսօր 2000-2500 պահնորդ կա: Օրենքն ուժի մեջ է մտնելու 2013 թվականից, մինչ այդ բոլոր կազմակերպությունները բարդ ընթացակարգով լիցենզավորում պետք է անցնեն. «Ընթացակարգով կազմակերպությունը պետք է ներկայացնի իր կանոնադրությունը, ուսուցում անցած և որակավորում ստացած պահնորդների և թիկնապահների փաստաթղթերը, որից հետո նոր ստանա լիցենզիա»: Ասոցիացիայի նախագահի խոսքերով՝ մեկ ամիսը բավարար է, որ պահնորդն ուսուցում ստանա: Այս առաջարկը ներկայացրել են կառավարություն ու սպասում են պատասխանի:
«Նախնական տեղեկութուններով՝ փորձում են այդ ժամկետները երկարացնել մոտ 4 ամիս: Իսկ այդ երկարացման արդյունքում մենք լիցենզիա չենք ստանա: Քանի որ հունվարի 1-ից է օրենքը ուժի մեջ մտնում, բոլորս կզրկվենք լիցենզիայից և գործունեություն չենք կարողանա ծավալել»,- անհանգստացած է Հովհաննես Պետրոսյանը:
