Ադրբեջանական anspress.com լրատվական կայքի փոխանցմամբ, ինքնաձիգի միջոցով ինքնասպան է եղել Ադրբեջանի հարավային հատվածում գտնվող, սահմանամերձ Ջալիլաբադի շրջանի պարեկատանը զինծառայություն կատարող Պետական սահմանապահ ծառայության մայոր Ռաֆիկ Գանիևը: Այս մասին հայտարարել են Ջալիլաբադի իրավապահները: Դեպքը գրանցվել է մարտի 9-ին, ինքնասպանության պատճառների մասին առայժմ ոչինչ չի հաղորդվում: Ռազմական դատախազությունում հարուցվել է քրեական գործ, տարվում է հետաքննություն:
Հիշեցնենք, որ մարտի սկզբին «Դոկտրինա» ռազմական լրագրողական հետազոտությունների կենտրոնի ղեկավար Ջասուր Սումերենլին հայտարարեց, որ այս տարվա հունվար-փետրվար ամիսներին զգալիորեն ավելացել է ադրբեջանական բանակի կորուստների թվաքանակը` հասնելով 22-ի, որոնցից 20-ը ներկայացրել են բանակը, 1-ը` ներքին զորքերը, 1-ը` սահմանապահ ծառայությունը. «19 զինծառայողների կորուստը համարվում է «ոչ ռազմական», միայն 3 զինծառայող է զոհվել մարտական իրավիճակում, 14 զինծառայող էլ վիրավորվել է: Իսկ 2010 թվականին զոհվել է 71 ադրբեջանցի զինծառայող, որոնցից միայն 17-ն են զոհվել մարտական իրավիճակում: Ընդհանուր առմամբ, 2003-2010 թվականներին ադրբեջանական բանակի կորուստները կազմել են 465 զինծառայող, որոնցում գերակշռել են անհասկանալի հանգամանքներում զոհվածները»: