Ռուս ուղղափառ եկեղեցու և հասարակության միջև հարաբերությունների սինոդալ բաժնի ղեկավար, Ռուսաստանի հանրային խորհրդի անդամ, Վսեվոլոդ վարդապետ Չապլինը հայտարարել է, որ իշխանությունն իրավունք ունի ուժ կիրառելու խռովությունը ճնշելու համար: Այս մասին գրում է RBC-ն:
«Կան իրավիճակներ, երբ պետությունը կարող է ուժ կիրառել, օրինակ՝ ճնշելու խռովությունները (հենց խռովությունները, այլ ոչ թե ապստամբությունները), դավադրությունները, ժողովրդի կամքին դեմ գնալով՝ նրան օտարներին հնազանդեցնելը: Երբ այդպիսի բաներ են տեղի ունենում, իշխանությունը հասարակության միջոցով պետք է պատասխանի ուժին ուժով»,- ասել է Չապլինը` պատասխանելով Հանրային խորհրդում հնչած հարցին:
«Ո՞վ գիտի, թե ինչպիսին կլիներ հիմա Ռուսաստանը, եթե 1917 թ. փետրվարին և հոկտեմբերին իշխանությունը իրեն վայել ձևով հակազդեր խռովարարներին, որոնք ամենևին էլ չէին ներկայացնում ժողովրդին և բացեիբաց հայտարարում էին, որ ցանկանում են հաստատել փոքրամասնության դիկտատուրան մեծամասնության նկատմամբ»,- ավելացրել է վարդապետը:
Չապլինի այս պատասխանը եղել է իշխանական «Նաշի» (հայաստանյան բազեների ռուսաստանյան տարբերակը) երիտասարդական շարժման ուղղափառ բաժնի ղեկավար Բորիս Յակեմենկոյի այն հայտարարության առնչությամբ, թե Քադաֆին ճիշտ է գործում, որ հրթիռներով և բոլոր հնարավոր միջոցներով ճնշում է իր դեմ դուրս եկածներին: «Եվ սա ամերիկյան «հեղափոխական տեխնոլոգիաների» դեմն առնելու ամենաճիշտ ճանապարհն է»:
Չապլինն ասել է, որ լավ է ճանաչում վերոնշյալ խոսքերի հեղինակին, և որ նա «արյունախում հրեշ չէ, ինչպես ներկայացնում են նրա ասածներից հետո: Հնարավոր է, որ նրա արտահայտածը ճիշտ ձևակերպված չէ, բայց նա արյան կողմնակից չէ»,- ասել է Չապլինը:
Այս ամենը մեծ սկանդալ է առաջացրել Ռուսաստանում: Ակնհայտ քադաֆիամետ քարոզչությունը չէր կարող անտարբեր թողնել շատերին: Կրկնակի տարօրինակ է, որ ցեղասպանություն հիշեցնող գործողություններն աջակցություն են ստանում հատկապես ռուս ուղղափառների կողմից: