Գեղարքունիքի մարզի Վարդենիսի տարածաշրջանում հայտնաբերված սիբիրյան խոց վարակիչ հիվանդության օջախն արդեն փակվում է: Այսօր «Առաջին լրատվական»-ի հետ զրույցում այս մասին ասաց հանրապետության գլխավոր համաճարակաբան Արա Ասոյանը՝ ներկայացնելով օրեր առաջ տարածված սիբիրյան խոց հիվանդության կանխարգելման միջոցառումները:
Նա նշեց, որ օրը մեջ լինում է Վարդենիսի տարածաշրջանում, վերահսկում իրավիճակը և հիվանդներին անհրաժեշտ օգնություն ցուցաբերում: Նրա հավաստիացմամբ՝ տեղում աշխատում են ՀՀ ԱՆ պետական հիգիենիկ և համաճարակային տեսչության, գյուղատնտեսության նախարարության և ոստիկանության ներկայացուցիչները, որպեսզի այդ տարածաշրջանից վարակված տավարի միս այլ համայնքներ, մասնավորապես` Երևան, չհասնեն: Դա է նաև պատճառը, որ Երևանում սիբիրյան խոց չի արձանագրվել:
Հարցին` ինչպե՞ս է սիբիրյան խոց հիվանդությունը տարածվել, պատասխանեց, որ ինչ-որ կերպ հիվանդ կենդանուց վարակը հասել է այդ գյուղ, իսկ թե ինչպես է եկել՝ անասնաբույժները կպարզեն:
«Ոչ մի բարդացած դեպք չունենք: Իմ գնահատմամբ` այն մարդիկ, ովքեր եղել են կասկածելի, նրանց, ում լաբորատորիան էր հաստատել վարակված, բոլորի վիճակը թեթև է, և արդեն երկու օր է` մենք կասկածելի դեպքեր չունենք: Ես օրը մեջ այնտեղ եմ. այն մարդիկ, ովքեր վարակված են, իմ պատասխանատվության տակ են, և շատերն արդեն դուրս են գրվել, շատերն էլ առաջիկա օրերին դուրս կգրվեն»,- մանրամասնեց Արա Ասոյանը՝ հավելելով, որ հենց տեղում է ամեն ինչ արվում` վարակի օջախը փակելու համար:
Հանրապետության գլխավոր համաճարակաբանը դժվարացավ վարակվածների հստակ թիվ հայտնել, քանի որ մարդիկ զգուշավոր են կա և դիմում են յուրաքանչյուր նախանշանի դեպքում: «Առայժմ ես սա չէի համարի խուճապ, բայց զգուշավորություն կա»,- նկատեց Արա Ասոյանը:
Սիբիրյան խոցը կենդանիների և մարդու մոտ հայտնաբերվող սուր վարակիչ հիվանդություն է։ Մարդիկ սիբիրախտով վարակվում են հիվանդ կենդանիներին խնամելիս, հարկադրական մորթի և մսեղիքը կտրտելու ժամանակ, ինչպես նաև վարակակիր հումքի հետ շփվելիս։ Սիբիրախտի մաշկային տեսակը վտանգավոր չէ, առավել վտանգավոր է որովայնային և թոքային տեսակը:
Հիշեցնենք, որ ՀՀ ԱՆ-ն սիբիրյան խոցի մասին ահազանգ ստացել էր հոկտեմբերի 20-ին, ուստի համաճարակաբանական հետազոտությունների արդյունքում տասնյակ մարդիկ հոսպիտալացվել էին, որոնցից մեկը՝ Երևանում:
