Երգչուհի Սոֆի Մխեյանը Հայաստանի մասին նոր երգ է թողարկել: Նրա խոսքով` մարդու կյանքում հասունանում է մի պահ, երբ հարց ես տալիս` ինչ է հայրենիքը քեզ համար, և այդ ժամանակ մեջդ ծնվում է Հայաստանին նվիրված երգ:
Երգչուհու խոսքով` ինքն իսկապես շատ է սիրում հայրենիքը: Նա փորձել է այս երգով տարբերվել, և մինչ այս Հայաստանին նվիրված երգերի խոսքերով փորձել են Ավետ Բարսեղյանի հետ մի նոր երգ ստանալ` երգերի խոսքերը մոնտաժելով և Հայաստանին նվիրված նոր երգ ստանալով: Երգը կոչել են «Հայաստանի երգը»:
Տեսահոլովակի ռեժիսորը Արեն Բայաթյանն է, երաժշտության հեղինակը` Էդգար Ալեքսանյանը, խոսքերի մոնտաժը` Ավետ Բարսեղյանի և Գրիգոր Կոկչյանի:
Արեն Բայաթյանի խոսքով` տեսահոլովակում փորձել են, որքան հնարավոր է, քիչ ներկայացնել երգչուհուն, քանի որ պետք էր ստեղծել մի բան, որը կառանձնանար: Այդ պատճառով որոշել են, որ տեսահոլովակը չպետք է լինի սինթետիկ:
«Ինչ ներկայացրել ենք, բնականի մեջ ենք ներկայացրել, իսկ Սոֆիից յուրաքանչյուր հարցում հեշտ է ամեն ինչ ստանալ»,- ասել է Արեն Բայաթյանը:
Երգչուհին ասաց, որ դիմել է երգերի բոլոր կատարողներին, նրանք տվել են իրենց համաձայնությունը, բայց թե հիմա ով ինչպես կընդունի` պարզ չէ.
«Դուք ինքներդ էլ լավ գիտեք, որ շոու-բիզնեսում մի քիչ այլ կերպ է` եթե անգամ արձագանքը դրական չէ, դիմացից չի ասվում, ամեն ինչ քննարկվում է ետևում: Սակայն չեմ կարծում, թե մենք վատ բան ենք արել. ևս մեկ անգամ փորձել ենք ընդգծել այն երգերը, որոնք իսկապես սիրված են»,- ասաց երգչուհին` ավելացնելով, որ երգը կգտնի իր տեղը Հայաստանին նվիրված երգերի ցանկում:
