Ավստրալիայի Տասմանիա նահանգի հոգեբուժական կլինիկայի տարածքում տեղակայված դիահերձարանը կվերածվի հյուրանոցի: Դիահերձարանը արդեն մի քանի տասնամյակ է` չի ծառայում իր նպատակին, այն ժամանակից ի վեր, երբ փակվել է մոտակայքում գտնվող հիվանդանոցը: Շուտով մեռյալների նախկին ապաստարանի պատերի ներքո հյուրանոց կբացվի, որն ի տարբերություն ճապոնական Lastel հյուրանոցի` կհանգրվանի ողջ մարդկանց:
Դիահերձարանի ներկայիս սեփականատեր Հեդին Փիրսի խոսքով՝ իր արտասովոր հյուրանոցը առաջին այցելուներին կընդունի արդեն 2013-ին:
Ավստրալիական CBS հեռուստաալիքի փոխանցմամբ՝ հնագույն իրերի վաճառքով զբաղվող Հեդին Փիրսը գնել է 7 ակր հողատարածք, որտեղ նախկինում գտնվել է Willow Court հոգեբուժական կլինիկան: Ներկայում այդ վայրն ամբողջությամբ լքված է, իսկ այդ տարածքում գտնվող 6 շինությունները՝ գրեթե ավերված: Փիրսը մտադիր է աստիճանաբար վերականգնել այդ շինությունները, այդ թվում` անցած դարի կեսերին կառուցված դիահերձարանը, որը ոչ միայն ծառայում էր կլինիկայի հիվանդներին, այլև շրջակա բնակավայրերի բնակիչներին:
Նախկին տերը փորձել է այդ անշարժ գույքը վերածել սրճարանի կամ տիկնիկային թատրոնի, սակայն այնուհետև հրաժարվել է այդ մտքից:
Հյուրանոցը կունենա ընդամենը 4 համար: Փիրսը համոզված է՝ արկածախնդիր այցելուներին կզվարճացնեն թուջե վաննաները, որտեղ ժամանակին դիակներին են լողացրել, և այլ խորհրդանշական իրեր:
