Արդեն 40 օր է Հյուսիսային Կորեայի առաջնորդ Կիմ Չեն Ունի կինը՝ Լի Սուլ Չժուն, չի երևացել հանրության առաջ: Արևմտյան մամուլը ենթադրություններ է արել, թե ինչու նա չի երևում պաշտոնական արարողությունների ժամանակ:
Այս պահին գոյություն ունի Լի Սուլ Չժուի «անհետացման» երկու տարբերակ: «Առաջինի համաձայն՝ կինը, որն արդեն քննադատության է ենթարկվել Հարավային Կորեայում և Չինաստանում այն բանի համար, որ հանրությանը երևացել է ֆրանսիական ապրանքանիշի պայուսակով, ստիպված է մեկուսացման մեջ մնալ, քանի որ երբեք Կիմ Չեն Իրի կամ Կիմ Իր Սենի պատկերով նշաններ չի կրել: Երկրորդ տարբերակի համաձայն՝ կինը հղի է»,- գրում է իտալական Corriere della Sera-ն:
Միաժամանակ, եթե խոսքն այն մասին է, որ Լի Սուլ Չժուն է կանգնած այն զգույշ տնտեսական բարեփոխումների ետևում, որը, ինչպես ասում են, իրականացնում է Կիմ Չեն Ունը, ապա նրա անհետացման պատմությունը միանգամայն այլ, ավելի լուրջ բնույթ է ստանում, ենթադրում է պարբերականը:
«Առեղծվածներով պարուրված երկրում գաղտնիքն առաջացել է այն բանից հետո, երբ Պխենյանը միանգամից փոխեց իր մասին պատկերացումը: Լին դարձավ առաջին տիկինը, ով Հյուսիսային Կորեայի գոյության 70 տարիների ընթացքում հայտնվեց հերթական առաջնորդի կողքին: Նա առաջինն էր, ով ազնվացրեց երկրում իշխանության միօրինակ պատկերը»,- ասվում է հոդվածում:
Ավելի վաղ հաղորդվում էր, որ Կիմ Չեն Ունը իշխանության գալով հասարակական բարքերի որոշակի լիբերալիզացիա է թույլատրել: Մասնավորապես, երիտասարդ առաջնորդը սկսել է հանրության առաջ հայտնվել իր կնոջ հետ, թույլատրել է հյուսիսկորեացի կանանց ջինսեր և բարձրակրունկ կոշիկներ կրել (ինչն, ի դեպ, սիրում է նրա կինը), հեծանիվ քշել, ինչպես նաև ներկա է գտնվել մանկական համերգի՝ դիսնեյյան կերպարների մասնակցությամբ, որոնք նախկինում համարվում էին արևմտյան մշակույթի խորհրդանիշեր:
Կիմ Չեն Ունը երկար ժամանակ իր ընտրյալին թաքցնում էր հանրությունից: Չնայած, ըստ խոսակցությունների, նրանք ամուսնացել են դեռ 2009թ., նա հանրությանն իր պաշտոնական կարգավիճակով երևացել է միայն 2012թ. հուլիսի 25-ին:
