Երգչուհի Բրիթնի Սփիրսի նախկին մենեջեր Օսամա (Սեմ) Լուֆթին պնդում է, որ երգչուհին նախկինում ակտիվորեն թմրանյութեր է օգտագործել: Այս հայտարարությունը Լոս Անջելեսում դատի ժամանկ արել է Լուֆթիի փաստաբանը` Ջոզեֆ Շլյայմերը, հաղորդում է BBC-ն: Լուֆթին դատարանում պնդում է, որ Սփիրսը խախտել է իրենց պայմանագրի կետերը:
Լուֆթին բողոք ունի նաև Սփիրսի ծնողների դեմ. Սփիրսի մորը մեղադրում է իր գրքում իրեն զրպարտելու, հորը` իրեն հարվածելու համար:
Լուֆթին և երգչուհին ընդհարվել են 2008-ին, և նա հրաժարվել է նրա ծառայություններից: Լուֆթին հույս ունի ստանալ երգչուհու մեծ կարողությունից մի մաս` պնդելով, որ պայմանագրի համաձայն` իրեն բաժին է հասնում երգչուհու եկամտի 15%-ը:
Երգչուհու մենեջերը եղած ժամանակ նրան հյուր գնալիս Լուֆթին թմրանյութեր գտնելու վարժեցված շուն է տարել իր հետ: Նա ասում է, որ մի անգամ շունն ինչ-որ նյութ է հայտնաբերել, սակայն Սփիրսն ասել է, որ դա ամֆետամին է: Սփիրսի ծնողները պնդում են, որ Լուֆթին նրա տան հեռախոսային լարերն է կտրել, թաքցրել նրա բջջային հեռախոսները, նրան վախեցնելու համար պապարացիներ է ուղարկել: Իրավիճակը նրա տեսանկյունից դատարանում կներկայացնեն Սփիրսի փաստաբանները:
