Գերմանացի մոդելավորող և լուսանկարիչ Կառլ Լագերֆելդը, որը Chanel-ում աշխատում է որպես դիզայներ, քննադատել է Ֆրանսիայի նախագահ Ֆրանսուա Օլանդի քաղաքականությունը ունևոր ֆրանսիացիների հանդեպ: Այս մասին հայտնում է El Mundo-ն:
«Այդ հիմարը այնպիսի մղձավանջ կդառնա, ինչպիսին Սապատերոն էր (Իսպանիայի նախկին վարչապետը): Օլանդն ատում է հարուստներին: Դա աղետ է: Նա ցանկանում է պատժել նրանց: Հարուստ ֆրանսիացիները հեռանում են երկրից, այլևս երկրի տնտեսությունում ներդրող չկա: Արտասահմանցիները չեն ցանկանում միջոցներ ներդնել Ֆրանսիայում»,- ասել է նա:
«Ֆրանսիան անմրցունակ է առանց նորաձևության ինդուստրիայի, շքեղ զարդերի, օծանելիքի և գինու: Մնացած ապրանքները չեն սպառվում: Ո՞վ կգնի ֆրանսիական մեքենա: Անձամբ ես՝ ոչ»,- հավելել է Լագերֆելդը:
Հարցազրույցում, որը կհայտնվի Marie Claire կանանց ամսագրի նոյեմբերյան համարում, հայտնի լուսանկարիչը իր քննադատությունն ուղղել է նաև Իսպանիայի թագավորական ընտանիքին: «Թագուհի Սոֆյան մոլորակի ամենադաստիարակված մարդն է: Նա արժանի չէ այն հիմարություններին, որ կատարում է թագավորը»:
