Իրանական Mehr News լրատվական գործակալության փոխանցմամբ՝ Պարսից ծոցում իրականացված քառաչափ սեյսմիկ մոնիթորինգը վկայել է տարածաշրջանում նավթի ու գազի նոր պաշարների հայտնաբերման մասին: Այս մասին հայտարարել է Offshore OilCompany-ի տնօրեն Մահմուդ Զիրակչիանզադեն:
Վերջինս մանրամասնել է, որ հետազոտությունն անցկացվել է Պարսից ծոցում գտնվող Abouzar և Forouz-B հանքավայրերում: Իրանի նավթարդյունաբերության նախարար Ռոստեմ Ղասեմիի խոսքերով՝ պլանավորված է մինչև 2016 թվականը Իրանում նավթի օրական արդյունահանման ծավալը հասցնել 1.5 միլիոն բարելի:
Իրանում գազի օրական արդյունահանումը կազմում է մոտ 600 միլիոն խորանարդ մետր: Կանխատեսվում է, որ հետագայում դա կրկնապատկվելու է՝ հասցվելով 1.2 միլիարդ խորանարդ մետրի: Իրանի ազգային գազային ընկերության տվյալներով՝ Իրանին բաժին է ընկնում գազի համաշխարհային պաշարների 16 տոկոսը:
