Հայաստանին ֆինանսապես օժանդակելու նպատակով Եվրամիության դոնորների համաժողովն առանձնապես չի գրավում ամերիկյան կողմին, թեև ՀՀ իշխանությունները հանդես են եկել առաջարկով՝ մասնակցել այդ համաժողովին: Ինչպես այսօր «Առաջին լրատվական»-ի հարցին ի պատասխան հայտնեց ԱՄՆ պետքարտուղարի օգնականի տեղակալ Էրիկ Ռուբինը, հայկական իշխանությունների առաջարկն ԱՄՆ-ը կդիտարկի առաջիկա շաբաթների ընթացքում:
«Դա, իհարկե, մեր համաժողովը չէ, սակայն մենք կդիտարկենք, թե ինչպես կկարողանանք մեր ներկայությունն ապահովել»,- ասաց ԱՄՆ պաշտոնյան:
Թե երբ է կայանալու ՀՀ իշխանությունների համար սպասված այդ դոնորների համաժողովը, դեռ հայտնի չէ. կողմերը ժամկետներ չեն հրապարկում, իսկ նախկինում հայտարարված ժամկետները վաղուց խախտվել են: Դեռ անցած տարվա վերջին ԵՄ ընդարձակման և հարևանության հարցերով հանձնակատար Շտեֆան Ֆյուլեի խոսնակը՝ Փիթեր Ստանոն, ասել էր, թե համաժողովը կհրավիրվի Հայաստանում խորհրդարանական ընտրություններից հետո, սակայն այն հետաձգվեց մինչև աշուն, քանի որ ընտրությունների արդյունքները չէին գոհացրել եվրոպացի ընկերներին, իսկ հետո հայտարարվեց, որ համաժողովը կանցկացվի նախագահական ընտրություններից հետո և կախված կլինի դրա արդյունքներից:
ՀՀ ֆինանսների նախարար Վաչե Գաբրիելյանից «Առաջին լրատվական»-ը հետաքրքրվեց՝ վերջապես ե՞րբ են հավաքվելու ԵՄ դոնորները: «Քննարկում ենք, նախապատրաստական աշխատանքներ ենք կատարում, մի քանի ամսվա ընթացքում կլինի, հնարավոր է՝ անցնի մյուս տարի»,- պատասխանեց Վ. Գաբրիելյանը:
Թե ինչ է ակնկալում ՀՀ-ն այդ համաժողովից, նույնպես դեռ պարզ չէ. «Մենք ներկայացնում ենք մեր անելիքները, այդ թվում՝ ներկայացնում ենք, թե ինչ բարեփոխումներ ենք ցանկանում իրականացնել, նրանք ներկայացնում են, թե ինչով կարող են աջակցել»,- նշեց նախարարը:
Ամերիկյան ֆինանսավորման և, ընդհանրապես մեր երկրում ԱՄՆ ներդրումների սակավության համար Վ. Գաբրիելյանը նույնպես «արդարացի» պատճառ գտավ. «Ամերիկյան կողմի ներդրումները պակասել են ոչ միայն Հայաստանում, այլև ամբողջ աշխարհում: Հիմա ամբողջ աշխարհում կա մի տերմին՝ փախուստ դեպի ապահովություն, և դա տեղի է ունենում դեպի ամերիկյան շուկա, որտեղ ավելի ապահով է դիտում միջազգային հանրությունը: Դա միայն ՀՀ-ին ներհատուկ չէ, այդ տեսակետից պետք է նայել գլոբալ համատեքստում»:
Մինչդեռ, պաշտոնական տվյալներով, 2010 թ. հունվար-հունիս ամիսներին ՀՀ-ում ԱՄՆ ընդհանուր ներդրումները կազմել են 12.5 մլն դոլար, այդ թվում՝ ուղղակի ներդրումները՝ 3.8 մլն դոլար, 2011 թ. նույն ժամանակահատվածում ներդրումներն ավելացել են համապատասխանաբար՝ 2.8 և 5.1 անգամ՝ կազմելով 35.2 մլն և 19.5 մլն դոլար, իսկ ահա 2012 թ. նույն ժամանակահատվածում ներդրումները նվազել են համապատասխանաբար՝ 22.1 %-ով և 12.7 %-ով ու կազմել ընդհանուր ներդրումները՝ 7.8 մլն դոլար, ուղղակի ներդրումները՝ 2.5 մլն դոլար:
Պատճառը, թե ինչու է ԱՄՆ-ը վերջին տարում կտրուկ նվազեցրել ՀՀ-ում ներդրումների ծավալները, հավանաբար նույնպես պետք է փնտրել քաղաքական հարթությունում:
Այն, որ ամերիկյան կողմը չի մասնակցի ԵՄ դոնորների համաժողովին, արդեն կարելի է հաստատապես ասել: Իսկ ՀՀ իշխանություններին մնում է միայն մի բան՝ «նստել թախտին՝ սպասել բախտին», թե ինչքանով եվրոպացիներն աչք կփակեն նախագահական ընտրությունների թերությունների վրա:
