Այսօր, ժամը 15.00-ի մոտակայքում, «Արմավիա» ավիաընկերությունը «Զվարթնոց» օդանավակայանին է փոխանցել 40 միլիոն դրամ, որը, սակայն, քիչ է չվերթների սպասարկումը վերսկսելու համար: Այս մասին «Առաջին լրատվական»-ին հայտնեց «Զվարթնոց» օդանավակայանի մամուլի քարտուղար Գևորգ Աբրահամյանը՝ հուշելով, որ ներկա պահին «Արմավիա»-ի պարտքը 3 միլիոն 118 հազար դոլար է:
Ըստ նրա` պարտքը պետք է նվազեցվի առնվազն մինչև 3 միլիոն դոլար, որպեսզի չվերթների սպասարկումը վերսկսվի:
Միաժամանակ «Արմավիա» ավիաընկերությունից «Առաջին լրատվական»-ին հավաստիացրեցին, թե ավիաընկերությունը ընթացիկ գումարներն ամբողջությամբ փոխանցել է, սակայն չմեկնաբանեցին, թե ինչու չվերթը մինչև հիմա չի իրականացվում: «Արմավիա»-ից չնշեցին, թե որքան գումար են փոխանցել:
Ավիաընկերության լրատվական ծառայության ղեկավար Նանա Ավետիսովան նշեց, որ ուղևորներն առայժմ փոխհատուցում չեն պահանջել, նրանց ասվել է, որ կարիքի դեպքում կարող են սնունդ և ջուր ստանալ:
Սակայն «Արմավիա»-ի Երևան-Մոսկվա չվերթին օդանավակայանում սպասող ուղևորները բողոքեցին, որ ոչ մի փոխհատուցում, սնունդ կամ ջուր չի առաջարկվել, և ավիաընկերությունից հստակ պատասխան չեն տալիս, թե թռիչքը երբ կիրականացվի:
Նշենք, որ օդանավակայանում 100-ից ավելի ուղևոր սպասում է թռիչքի:
