Regnum լրատվական գործակալության փոխանցմամբ՝ Ադրբեջանի խորհրդարան է ներկայացվել «Հանրահավաքների ազատության մասին» օրենքում փոփոխություններ կատարելու օրինագիծը, որով նախատեսվում է ավելացնել իշխանությունների կողմից չարտոնված բողոքի ակցիայի կազմակերպիչների ու մասնակիցների պատժաչափը:
Ըստ այդ օրինագծի՝ չարտոնված ակցիայի մասնակիցները կտուգանվեն 500-1000 մանաթով (նախկինում 7-13 մանաթով, 1 դոլարը հավասար է 0.78 մանաթի): Իսկ այդ ակցիաների կազմակերպիչների համար տուգանքը կազմելու է 1500-3000 մանաթ: Եթե կազմակերպիչը պաշտոնյա է, ապա այդ դեպքում տուգանքը կազմելու է 3000-6000 մանաթ: Իսկ եթե կազմակերպիչն իրավաբանական անձ է, ապա այդ դեպքում տուգանքի չափը սահմանվել է 15,000-30,000 մանաթ:
Հիշեցնենք, որ ադրբեջանական ընդդիմության հերթական հանրահավաքը Բաքվում անցկացվելու է հոկտեմբերի 20-ին: