ԱՄՆ կաթոլիկ եպիսկոպոսների կոնֆերանսը մեկնաբանել է դեմոկրատ Ջո Բայդենի հայտարարությունը, որը նա արել է հանրապետական փոխնախագահի թեկնածու Փոլ Ռայանի հետ բանավեճի ժամանակ:
Եպիսկոպոսները կարծում են, որ Բայդենը ստել է՝ ասելով, թե կառավարությունը կոնֆեսիոնալ ինստիտուտներին չի ստիպում վճարել «ծնելիության վերահսկողության» համար:
Եպիսկոպոսների խոսքերով՝ «ծնելիության վերահսկողության» հետ կապված իրական իրավիճակը միանգամայն այլ է: Եկեղեցական հաստատությունները պետք է, բժշկական ապահովագրության շրջանակներում, իրենց աշխատակիցներին ապահովեն հակաբեղմնավորիչ միջոցներով, անգամ եթե դա հակասում է իրենց հայացքներին և հավատքին:
Հիշեցնենք. այս տարվա մայիսին ԱՄՆ ավելի քան 40 առավել ազդեցիկ կառույցներ, այդ թվում՝ խոշոր եպիսկոպոսություններ և համալսարաններ, դատական հայց ներկայացրին երկրի առողջապահության նախարաության և սոցիալական ծառայությունների, ինչպես նաև նախագահի աշխատակազմի դեմ:
Երկրի կաթոլիկ առաջնորդների կարծիքով՝ դատավարությունը ԱՄՆ կառավարության վրա ազդելու վերջին հնարավորությունն է, քանի որ նա խախտում է կրոնական ազատության սկզբունքները և ստիպում կաթոլիկներին, հակառակ իրենց խղճի, իրենց հարկերից վճարել հակաբեղմնավորիչների համար,- հաղորդում է katolik.ru-ն:
Ավելի վաղ ԱՄՆ կաթոլիկ եպիսկոպոսների կոնֆերանսը հայտարարել էր, որ Օբաման և նրան պաշտպանող ԶԼՄ-ները խաբում են հասարակությանը՝ քարոզելով հակաբեղմնավորիչները՝ որպես պրոֆիլակտիկ միջոցներ, որոնք «երջանկացնում են կանանց»:
