Երեկ ՀՅԴ Ամերիկայի Հայ դատի հանձնախումբը հայտարարել է, որ ոչ նախագահ Բարաք Օբամային, ոչ Մասաչուսեթսի նախկին նահանգապետ Միթ Ռոմնիին չի սատարի նոյեմբերի 6-ին կայանալիք նախագահական ընտրություններում, քանի որ նրանք չեն վաստակել հայ համայնքի աջակցությունը: Հանձնախումբը նշել է, որ Բ. Օբաման 2008թ. ուներ Հայ դատի գրասենյակի աջակցությունն ու ամերիկահայերի քվեները և բազմիցս խոստացել էր աշխատել Հայոց Ցեղասպանության ճանաչման, ինչպես նաև ամերիկահայերին հուզող այլ խնդիրների ուղղությամբ: Եվ քանի որ նրանք իրենց խոստումը չեն կատարել, իրենք որոշել են ոչ մեկին չաջակցել:
Աժ արտաքին հարաբերությունների մշտական հանձնաժողովի նախկին նախագահ Հովհաննես Հովհաննիսյանը «Ժողովուրդ»-ի հետ զրույցում ասաց, թե սա ամենևին չի նշանակում, որ հայերը խաբված վիճակում են. «Պետք է մենք միշտ մեզ չխաբենք, թե նախագահներն ընտրվելուց հետո կարտասանեն ցեղասպանություն բառը, բայց իրենք միշտ ինչ-որ ձևեր են գտնում ուրիշ բառերով ցեղասպանությունը ներկայացնելու համար: Եվ ես կարծում եմ, որ այդ ամենը միշտ էլ կկրկնվի, սա առաջին ընտրությունները չեն, և սա առաջին նախագահի թեկնածուն չէր, որ նման խոստում էր տվել: Ես չէի ասի, որ մենք խաբվածի կարգավիճակում ենք, դա ցանկության խնդիր է»:
