«Առավոտ»-ը նախկինում տեղեկացրել էր, որ կովերն ազատ արածում են Նոյեմբերյան քաղաքի կենտրոնում, Հայ-հունական բարեկամության զբոսայգում: Կովերը «գրին քարտ» ունեն նաև Տավուշի մարզկենտրոն Իջևանում: Դրանք արածում են Տավուշի մարզպետարանի առաջ, քաղաքային զբոսայգում` խորհրդային տարիներին անցկացված քանդակի միջազգային սիմպոզիումի ժամանակ արարված, զբոսայգում տեղադրված քանդակների մոտ և այլուր:
Անցյալ տարվա աշնանը Իջևանի քաղաքապետ ընտրված Վարդան Ղալումյանի նախաձեռնությամբ քաղաքի տարբեր հատվածներում 3000 հատ վարդի թուփ և եղևնի է տնկվել: Տնկված վարդի թփերի մի մասը դարձել է թափառող կովերի կեր: Իջևանի երկրագիտական թանգարանի տնօրեն Նարիման Թանանյանը «Առավոտ»-ի հետ զրույցում ասաց, որ 1961թ. Իջևանը քաղաքի կարգավինակ է ստացել, սակայն դրանից կես դար անց 20 հազարանոց քաղաքի որոշ բնակիչներ իրենց քաղաքաբնակի պես չեն պահում, կովերը կթելով` քշում են ուր պատահի, քաղաքում կարելի է տեսնել թափառող ձիեր, շների խմբեր: Իջևանի քաղաքապետ Վարդան Ղալումյանն ասաց, որ իրենց կողմից թափառող կենդանիների տերերի համար տուգանքներ են սահմանվել 20-30 հազար դրամի չավով: Քաղաքապետի վկայությամբ` շատ դեպքերում թափառող կովերի տերերը կարիքավոր մարդիկ են, ովքեր քաղաքապետարանում խնդրում են իրենց չտուգանել:
