Բժիշկները, իրավաբանները, փաստաբանները, լրագրողները, ինժեներները, դեղագործները և այլ ոլորտների աշխատակիցներ բողոքի ցույց են անցկացնում Հունաստանում հինգշաբթի կայանալիք 24-ժամյա համընդհանուր գործադուլի նախօրեին:
Արհմիություններն այսօր բողոքի երթ կանցկացնեն Աթենքում՝ ֆինանսների նախարարության շենքի մոտ: Այս մասին հայտնում է RIA Novosti-ն:
Գործադուլավորների պահանջների մեջ է մտնում աշխատանքի շուկայում բարեփոխումների կասեցումը, որոնք կոչված են մրցակցության բարձրացմանը, սակայն կհանգեցնեն արտոնությունների վերացմանը, որոնցից օգտվում են մի շարք մասնագիտությունների տեր մարդիկ: Բացի այդ, նրանք դժգոհում են աշխատավարձերի և թոշակների կրճատումներից, որոնց հիմքում երկրին վարկային օգություն տրամադրող ԵՄ-ի և ԱՄՀ-ի պահանջներն են:
Գործադուլների հետևանքով այսօր և վաղը հիվանդանոցներում և պոլիկլինիկաներում կաշխատեն միայն հերթապահ անձնակազմեր:
Լրագրողների 24-ժամյա գործադուլը սկսվել է այսօր: Հինգշաբթի լրագրողները կանցկացնեն 4-ժամյա գործադուլ:
Հինգշաբթի, ինչպես սպասվում է, փակ կլինեն բոլոր պետական հաստատությունները և բազմաթիվ մասնավոր ձեռնարկություններ: Զանգվածային բողոքի ցույցեր են սպասվում: Հինգշաբթի երկրում խաթարված կլինի նաև տրանսպորտային հաղորդակցությունը: Սպասվում է, որ գործադուլին կմիանան նաև ավիակարգավարները, սակայն նրանց արհմիությունը դեռևս այդ առնչությամբ որոշում չի ընդունել: