Քաղաքաշինության նախկին նախարար, ԲՀԿ-ական Վարդան Վարդանյանը երեկ հարցաքննվել է ոստիկանության քննչական գլխավոր վարչությունում: Տեղեկություններ կան, որ իրավապահներին պատվիրված է ուշադիր լինել ԲՀԿ-ականների նկատմամբ: Այս և այլ հարցերի շուրջ է «Առաջին լրատվական»-ի զրույցը Երևանի ոստիկանապետ Ներսես Նազարյանի հետ:
– Պարոն Նազարյան, այսօր քաղաքաշինության նախկին նախարար, ԲՀԿ-ական Վարդան Վարդանյանն է հարցաքննվել ոստիկանության քննչական վարչությունում: Տեսակետ կա, որ ոստիկանությանը, իրավապահ մարմիններին ԲՀԿ-ականների հանդեպ «ուշադիր լինելու» ցուցում կա:
– Ես տեղյակ չեմ և բացարձակ նման քննության հետ ես կապ չունեմ: Ոստիկանները ոչ մի պատվեր չեն կատարում, իմացեք:
– Այսօր, սակայն, ասվում է, որ հնարավոր է այլ նոր քրգործեր հարուցվեն:
– Չգիտեմ, ես տեղյակ չեմ, ինֆորմացիա չունեմ:
– Պարոն Նազարյան, Երևան քաղաքի միջոցառման ժամանակ փողոցներում, կարելի է ասել, խառնաշփոթ էր, կանգառներում ահավոր կուտակումներ էին, օրվա վերջում էլ «Մարիոթի» և Տրանսպորտի նախարարության շենքերի տանիքները հրդեհվեցին, ինչը հասարակության անվտանգության տեսանկյունից վտանգավոր երևույթ էր…:
– Չէ՛, վտանգավոր երևույթ չէր կարող լինել, տանիքների վրա լուրջ բան չկար, բացի դա` մարդիկ կային, որոնք պատրաստ էին և արագ հանգցրեցին կրակը: Մեր հետ կապված չի: Տանիքները սեփական տարածք են: Ունեն իրենց անվտանգության, հրշեջ ծառայությունները, որոնք և արեցին գործը: Էդ արկղերի հետ կապված է եղել, էդպես լուրջ բաներ չկան:
– Սակայն կարող էր չէ՞ լուրջ բան լինել, եթե մոտակայքում մարդ լիներ: Այս էլ որերորդ անգամ է` վտանգավոր երևույթներ են տեղի ունենում: Սա նշանակո՞ւմ է, որ նաև ոստիկանությունը չի կարողանում միջոցառումները հավուր պատշաճի կազմակերպել:
– Ոստիկանությունը օր օրի ավելի կատարելագործված, ավելի լավ է պատրաստված, և շատ պարզ բոլորը տեսնում են: Եթե երեկ 20 հազար մարդ կար, և անփորձանք, անվտանգ անցավ. գիտեք` ինչ էր կատարվում, եթե ոստիկանությունը կարողացավ դա կազմակերպել, ոստիկանության աշխատանքը միմիայն գովելի է: Ի տարբերություն ձեզ, ովքեր որ զանգել են, բոլորը գովել են մեր ծառայությունը: Ես ինքս եմ դրսում եղել, և անցել է շատ լավ, նորմալ, առանց որևէ միջադեպի, այնպես որ, ոստիկանությունը բարձունքի վրա է:
– Ասել է թե` հրդեհները միջադեպ չե՞ք համարում: Նաև այն, որ մարդիկ կուտակվել էին փողոցներում, չէին կարողանում տեղ գնալ:
– Բա մեծ քանակի ժողովուրդ կար, բա էդպես պետք է լինի, իհարկե: Ամբողջ հանրապետությունը եկել էր Երևան, Կենտրոնի փոքր հատվածը: Դե տոն էր, տոների ժամանակ լինում է էդպես: Դա բոլորիս տոնն էր, և բոլորը շատ ուրախ էին: Հիմա մի քիչ էլ նեղություն կարա լինի: Կարա մի ճանապարհ էլ էդպես լինի: Կարող են ոտքով քայլեն: Կազմակերպված էր նորմալ: Եկեք ընդունենք, որ շատ լավ տոն էր: Հրդեհը նորմալ չի, բայց կքննարկեն` ինչի պատճառով էր դա: Եթե որևէ լուրջ բան կլինի, արդեն նյութեր կլինեն, մեղավորներին կպատժեն: Դա մեր ծառայության հետ որևէ կապ չունի:
– Սակայն նախորդ անգամ` փուչիկների պատմության ժամանակ էլ կազմակերպիչները չպատժվեցին, պատժվեց մեկ փուչիկ փչող:
– Ո՞վ է ասում` չպատժվեց…: Դա մեր հետ կապ չունեցող բան է: Մենք հասարակական կարգ ենք պահում: Եվ մեր ոստիկանները ծառայել են գերազանց, որի համար ես շնորհակալություն եմ հայտնել, որ մեր ժողովուրդն այդ քանակի լինելով և շատ ագրեսիվ լինելով` կարողացանք ապահովել, որ ոչ մի միջադեպ չլինի:
– Պարոն Նազարյան, երբ գնացիք արձակուրդ, ասվում էր, որ հնարավոր է հետ չգաք: Փաստորեն հետ եկաք և ի՞նչ եք կարծում` որքա՞ն կշարունակեք Ձեր ծառայությունը:
– Որքան որ ղեկավարներս հարմար կգտնեն:
– Իսկ ինչպե՞ս են հիմա Ձեր հարաբերությունները Վովա Գասպարյանի հետ, ասվում էր, որ ժամանակ առաջ լարված էին:
– Սրանից լավ չի կարա լինի, ընտիր: Անկեղծ` ընտիր, շատ լավ:
– Ասել է թե` կշարունակե՞ք պաշտոնավարել:
– Իհարկե, եթե ղեկավարները գտնեն հարմար:
– Ինչպե՞ս հասկանանք Ձեր տեղակալի վերջին փոփոխությունը` երբ Ռոբերտ Մելքոնյանը փոխարինվեց Վալերի Օսիպյանով, որը նախորդից ավելի բարձր վարկանիշ չուներ, երկուսն էլ և Մարտի 1-ի դեպքերին էին մասնակցել, և այլն:
– Շատ համաչափ աճ է դա, պարոն Մելքոնյանը շատ լավ ծառայելով գնացել է թոշակի, և նրան փոխարինեց էն մարդը, որը մի աստիճան ցածր էր գտնվում, ծառայության պետն էր, և նա էլ պետք է փոխարիներ իրեն:
