Հայտնի գործակալ Դմիտրի Սելյուկը մեկնաբանել է այն տեղեկությունները, որ «Շախտյոր»-ի ֆուտբոլիստ Հենրիխ Մխիթարյանը չգիտի, թե ով է Դմիտրի Սելյուկը:
«Կարծում եմ, որ այս տեղեկությունները «հայկական ռադիո»-ն է տարածել: Բանն այն է, որ Հենրիխի` «Շախտյոր» տեղափոխության հարցերով ես եմ զբաղվել, և նա ոչ մի կերպ չէր կարող ասել, թե չի ճանաչում ինձ: Կարծում եմ, իհարկե, որ Հենրիխը ճանաչում է ինձ»,- հայտարարել է Սելյուկը:
Հիշեցնենք, որ Միրչա Լուչեսկուն օրերս հայտարարել է, որ Մխիթարյանի գործակալը նրա մայրն է: Միաժամանակ Դմիտրի Սելյուկը հայտնել է, որ պաշտպանում է Մխիթարյանի շահերը, թեկուզև ոչ որպես գործակալ:
Նշենք, որ Հայաստանի ազգային հավաքականի ֆուտբոլիստը Երևանի պատվավոր քաղաքացու կոչում է ստացել:
