«Քանի որ Հայաստանը չունի դիվանագիտական հարաբերություններ Թուրքիայի հետ, թուրքական կողմի հետ նախնական պայմանավորվածություն է ձեռք բերվել, որպեսզի Սիրիա թռչող հայկական բարեգործական բեռներ տեղափոխող օդանավն իջնի Էրզրումի օդանավակայանում, և այնտեղ բեռների զննում կատարվի»,- «Առաջին լրատվական»-ի հետ զրույցում ասաց ԱԺ ՀՅԴ պատգամավոր, «Օգնիր եղբորդ» նախաձեռնության անդամ Վահան Հովհաննիսյանը:
Նրա խոսքով՝ բնական է, որ օդանավը Թուրքիայում պետք է վայրէջք կատարեր, քանի որ Թուրքիայի տարածքով թույլատրված են միայն հայկական ավիաուղիների ուղևորատար ինքնաթիռները, հետևաբար բեռնատար օդանավերի թռիչքների դեպքում պետք էր հատուկ համաձայնություն ձեռք բերվեր:
«Առաջին հումանիտար թռիչքի ձգձգման պատճառը եղել է այն, որ բանակցություններ են տարվել թե՛ ընդունող երկրի հետ, որտեղ քաղաքացիական պատերազմ է, թե՛ միջանկյալ երկրի հետ, որը փաստորեն հանդիսանում է քաղաքացիական պատերազմի կողմ: Թուրքիան պահանջեց թուրքական տարածքում մի տեղ իջնել, որպեսզի բեռը զննվի` համոզվելու համար, որ այն իրոք մարդասիրական է: Հայկական կողմը դեռ չի քննարկում` դա լավ է, թե վատ»,- ասաց Վահան Հովհաննիսյանը՝ միաժամանակ նշելով, որ լավ են գիտակցում՝ թուրքական կողմից բարեկամական վերաբերմունք ակնկալել պետք չէ:
Ըստ ՀՅԴ պատգամավորի՝ ի սկզբանե թռիչքային ուղին այսպես է կազմվել՝ Երևան-Էրզրում-Հալեպ: «Որևէ հարկադրանք չի եղել: Թե ինչո՞ւ է մեր որոշ լրատվամիջոցների համար մազոխիստական մոտեցումը այսքան հրապուրիչ` չեմ հասկանում. ամեն ինչ գնում է իր ծրագրով»,- ասաց նա:
Հարցին` ինչո՞ւ նախապես լրատվամիջոցներին չէր տեղեկացվել, որ դա ծրագրված է, որպեսզի աղմուկ չբարձրանար, Վահան Հովհաննիսյանը պատասխանեց. «Ես չեմ կարծում, որ դա ճիշտ մոտեցում էր. դա էլ սպեկուլյացիաների տեղիք կտար: Եթե մենք երկու օր առաջ հայտարարեինք, թե ինչ ճանապարհով է թռչում ինքնաթիռը, մեզ կսկսեին նույն ձևով հարցապնդումների տարափի տակ պահել»:
Ըստ նրա՝ չի բացառվում, որ անզգույշ խոսքերն ու տեղեկատվությունը կարող են վնասել ծրագիրը:
Հիշեցնենք, որ դեպի Սիրիա պարենամթերք և առաջին անհրաժեշտության դեղորայք տեղափոխող հայկական ինքնաթիռն այսօր վայրէջք է կատարել Թուրքիայի տարածքում՝ Էրզրումում, բեռների ստուգման նպատակով:
