Սիրիական զորքերը ապստամբների դեմ մարտեր են մղում երկրի 9 շրջանում: Ինչպես հաղորդել է «Ալ-Իհբարիա» արբանյակային հեռուստաալիքը, Դեր Զոր քաղաքում սիրիացի զինծառայողները Ռուդա մզկիթի մերձակայքում ոչնչացրել են ծայրահեղական զինված խմբավորմանը:
Դաժան մարտեր են ընթանում ապստամբների հետ Ումալ և Շեյխ-Յասին թաղամասերում:
«Սուրիա ալ-Էն» տեղեկատվական գործակալության փոխանցմամբ` կառավարական հատուկ ստորաբաժանումները ռազմական գործողություններ են իրականացնում Սիրիայի հյուսիս-արևելքում գտնվող Ռակեյում: Զգալի կորուստներ են կրել Թել-Աբյադ և Սուլուք քաղաքի ապստամբները:
Ինչպես տեղեկացնում է «Ալ-Ջազիրա» հեռուստաալիքը, «Սիրիական ազատ բանակի» «ապստամբները» ակտիվ են մասնավորապես Թուրքիայի հետ սահմանակից Իդլիբում, որի միջով անցնում է կարևոր ռազմավարական մայրուղի` Լաթաքիայի նավահանգստից Հալեպ: Հեռուստաալիքի փոխանցմամբ` Ջիսր էշ-Շուղուրում ապստամբները գերեվարել են 256 զինվորների և սպաների: Դամասկոսի ռազմական աղբյուրները չեն հաստատել այս տեղեկատվությունը:
Հոմսում այսօր ազատ են արձակվել ծայրահեղականների կողմից գերեվարված տեղի 9 քաղաքացիներ, իսկ Բեյթ-Նաիմ քաղաքում ոչնչացվել են երեք վտանգավոր ահաբեկիչներ, որոնք դիվերսիաներ էին նախապատրաստել Դամասկոսում:
Հալեպի արևելյան ծայրամասերում գրոհայինները ուժեղ դիմադրություն են ցույց տալիս կառավարական կանոնավոր զորքերին: Սիրիական հեռուստաալիքը հաղորդել է Հալեպում ապստամբների ռազմատրանսպորտային տասնյակ միջոցների ոչնչացման մասին:
