«Ժառանգություն» կուսակցության լրատվական ծառայությունից հայտնում են, որ Երևանում տխրությամբ տեղեկացանք, որ երկարատև մարմնական տկարությունից հետո երեկ Երուսաղեմում իր երկրային առաքելությունն է ավարտել և ի Տեր է ննջել Երուսաղեմի հայոց շնորհազարդ պատրիարքը` Տ. Թորգոմ Արք. Մանուկյանը:
Պատրիարք Սրբազանի եկեղեցական ծառայությունը սկզբնավորվել է 1930-ականներին Երուսաղեմի Սբ. Հակոբյանց Միաբանությունում: Այնուհետ նա երեք տասնամյակ առաջնորդել է Հայաստանյայց առաքելական եկեղեցու Ամերիկայի Արևմտյան, ապա Արևելյան թեմերը: Վազգեն Առաջին Վեհափառի վախճանումից հետո, մինչև Գարեգին Ա կաթողիկոսի ընտրություն Թորգոմ Սրբազանը վարել է Կաթողիկոսական տեղապահի պաշտոնը Սբ. Էջմիածնում: 1990-ին ընտրվելով Երուսաղեմի Հայոց Պատրիարք` մինչև մահ Սրբազանն իր աստվածահաճո ու եկեղեցանվեր ծառայությունն է բերել Երուսաղեմի Սբ. Հակոբյանց Միաբանությանը` իբրև Սուրբ Քաղաքի քրիստոնեական երեք պատրիարքություններից մեկի Աթոռակալ:
Թեև բազում են ժողովուրդները ու անցնող դարերը, միայն Երուսաղեմի Հայոց Պատրիարքին է շնորհված Քրիտոնեական եկեղեցու առաջին պատրիարքի` Հակոբոս Տեառնեղբոր Աթոռին բազմելու պատիվը: Թեև բազում են ժողովուրդները ու անցնող դարերը, միայն Երուսաղեմի Հայոց Միաբանությանն է պատկանում Սիոնի գագաթը, որ համաձայն Աստվածաշնչի Աստծո բնակության վայրն է Երկրի վրա: Թեև բազում են ժողովուրդները և անցնող դարերը, միայն Երուսաղեմի Հայոց Միաբանությունը և Պատրիարքն են քրիստոնյա աշխարհի սրբություն-Սրբոցի` Տերունական Սրբավայրերի երեք իրավատերերից մեկը երկնքի ներքո:
Թորգոմ Պատրիարքը Երուսաղեմի հայոց 96-րդ պատրիարքն էր, հետևաբար մեկը Եկեղեցու հարյուրի չհասնող առանձնաշնորհյալ սպասավորներից, ում Աստծո ընտրությամբ և մարդկանց մեծարանքով շնորհվել են բոլոր այդ պատիվները: Թող լույսը, Աստծո խաղաղությունն ու օրհնությունը պարուրեն Սրբազան Պատրիարքի հոգին Վերին Երուսաղեմում, ինչպես նրա կյանքի ուղեկից են եղել երկրային ընթացքում: Եվ թող հավերժ նորոգ ու անսասան լինի Երուսաղեմի Հայոց Պատրիարքությունը` իբրև վեմ Սուրբ Քաղաքի, իբրև հոգևոր շինվածք մեր Տեր Հիսուս Քրիստոսի և իբրև հպարտություն ու պանծանք հայ ժողովրդի:
