Հայաստանում տարօրինակ իրավիճակ է ստեղծվել` ընդդիմադիր ուժերը գնում են տրոհման ճանապարհով: Այսօր լրագրողների հետ հանդիպմանը նման դիտարկում արեց ԼՂՀ նախկին արտգործնախարար Արման Մելիքյանը` հիշեցնելով, որ «Ժառանգություն» և «Ազատ դեմոկրատներ» կուսակցությունները նույնպես տարաձայնություններ ունեն:
Արման Մելիքյանն արձանագրեց, որ այսօր խորհրդարանում իշխանություններին դեմ առավել ազդեցիկ ուժը նախկինում կոալիցիայի մաս կազմած ԲՀԿ-ն է: Մյուս կողմից, նրա խոսքով, ակնհայտ է, որ ԲՀԿ-ն ստորագրելով նախագահական ընտրություններում Սերժ Սարգսյանին սատարելու վերաբերյալ պարտավորագիրը, դեռևս հակառակի մասին հայտարարություն չի արել: Արման Մելիքյանի խոսքով` նախկինում ընդդիմադիր կեցվածք ունեցած կուսակցությունները սպառել են իրենց ռեսուրսները, ընդունելով ընտրությունների արդյունքները` գլխիկոր հայտնվել են խորհրդարանում:
Իրավիճակն, ըստ Մելիքյանի, այնպիսին է, որ մյուս ուժերը ԲՀԿ-ին դիտարկում են որպես ավագ եղբայր: Մյուս կողմից, բանախոսի դիտարկմամբ, ԲՀԿ-ն քաղաքական երանգների տեսանկյունից իշխող կոալիցիայից չի տարբերվում: «Այն, որ իշխանական թևը ճեղքվեց, բաժանվեց երկու մասի, չի նշանակում, որ իշխանությունից ազատված ուժը քաղաքական նոր որակ է ձեռք բերել»,- նշեց նա:
Նախագահական ընտրություններում գործող իշխանության թեկնածուն` Սերժ Սարգսյանը, Արման Մելիքյանի կարծիքով, լավագույն դիրքերում է:
Այն, ինչ կատարվում է այսօր Հայաստանում, իշխանական վերնախավի ցուցադրական փորձերը` հավատացնելու, թե պատրաստ են գնալ կտրուկ փոփոխությունների ճանապարհով, կադրային ջարդ անել, ըստ բանախոսի, անարդյունք կլինի, քանի որ «ոչ թե ձուկն են գլխից բռնել, այլ գործն են սխալ բռնել»: Ա. Մելիքյանը կարծում է, որ այս իշխանությունները էական փոփոխությունների ընդունակ չեն:
Նրա խոսքով` գործող իշխանությունը պետք ունենա արժանի հակառակորդ, որը կկարողանա ստանալ ժողովրդի քվեն: «Ընդդիմության այս որակի պարագայում, չեմ գտնում, թե ընդդիմության թեկնածուն կկարողանա հաղթել գործող իշխանությանը: Ընդդիմության մեջ չափից շատ են նեղացածությունն ու փոխադարձ մեղադրանքները»,- ասաց նա: Արման Մելիքյանի խոսքով` այս պայմաններում դժվար թե ընդդիմության անդամներից մեկը կարողանա միասնական թեկնածու լինել: Միակ ելքը կոնսենսուսային տարբերակով ընդդիմության թեկնածու ընտրելն է: Ո՛չ Լևոն Տեր-Պետրոսյանը, ո՛չ Վարդան Օսկանյանը, ո՛չ Գագիկ Ծառուկյանը, ո՛չ էլ Դաշնակցությունը, Արման Մելիքյանի խոսքով, միանձնյա չեն կարողանա որևէ բան անել և չունեն այն թեկնածուն, որն ընդունելի կլինի ժողովրդի համար:
Անդրադառնալով Վրաստանում կատարված իշխանափոխությանը` նա նշեց, որ «Վրացական երազանքի» հաղթանակը մեկ օրում չծնվեց, և չպետք է այն պարզունակ հաղթանակ անվանել: Միաժամանակ, նրա համոզմամբ, Հայաստանում այսօր նույնը կրկնելու նախադրյալներ չկան, քանի որ հայկական քաղաքական վերնախավը` և՛ իշխանությունը, և՛ ընդդիմությունը, դեռ պատրաստ չեն դրան: Մյուս կողմից` եթե Վրաստանը Սաակաշվիլիի օրոք ռուսական գերիշխանության տիրույթից դուրս է եկել, Հայաստանը այդ վիճակում չէ: Հետևաբար, ըստ Արման Մելիքյանի, դա բարդացնելու է վրացական մոդելի հիմնումը Հայաստանում:
