ԼՂՀ նախկին արտգործնախարար Արման Մելիքյանն այսօր լրագրողների հետ հանդիպմանն ասաց, որ դեռ վերջնական որոշում չի կայացրել` 2013 թվականի նախագահական ընտրություններում կառաջադրի՞ իր թեկնածությունը, թե՞ ոչ: Նա նշեց, որ առաջադրման վերաբերյալ վերջնական որոշում կկայացնի առաջիկա ամսվա ընթացքում` հավելելով, որ այժմ վերլուծում է իրավիճակը:
«Պատրաստ եմ առաջադրվելու, կրելու դրա հետ կապված պատասխանատվությունը: Ուղղակի երկու մոտեցում կարող է լինել առաջադրման դրդապատճառ: Առաջին` եթե իսկապես քաղաքական ուժերը որոշեն տեսնել կոնսենսուսային ոչ կուսակցական թեկնածուի, որին հարմար կգտնեն աջակցել, և երկրորդ` դա կլինի առաջադրում, որը կոչված կլինի սատարելու այն ընտրազանգվածին, այն ընտրողներին, որոնք պարզապես չեն հանդուրժում ստեղծված իրավիճակը: Թող սա լինի «բոլորին դեմ եմ» տարբերակը, որովհետև այնպես, ինչպես այսօր ենք ապրում, շարունակելն անհնար է»,- ասաց նա:
Արման Մելիքյանը կարևորեց նաև այն, որ նույնիսկ կեղծված ընտրությունների դեպքում յուրաքանչյուրն իմանա, որ իր ձայնը չի տվել իրեն խաբող կուսակցությանը կամ իրեն կեղեքող իշխանությանը:
