Թուրքական TRT Haber հեռուստաալիքի փոխանցմամբ` Թուրքիայի խորհրդարանը երեկ մի քանի օրվա ընդմիջումից հետո երկրորդ անգամ անդրադարձել է 2013թ. հոկտեմբերի 27-ին տեղական ինքնակառավարման մարմինների (ՏԻՄ) վաղաժամ ընտրությունների անցկացման խնդրին, ինչի համար անհրաժեշտ է ուղղումներ կատարել երկրի Սահմանադրության մեջ:
Այս անգամ 550 հոգանոց մեջլիսում սահմանադրական ուղղումների օգտին քվեարկել է 360 պատգամավոր, որոնք ներկայացնում են իշխող «Արդարություն և զարգացում» կուսակցությունը (ԱԶԿ) և «Ազգայնական շարժում» կուսակցությունը (ԱՇԿ): Սակայն սահմանադրական ուղղումների հաստատման համար անհրաժեշտ էր, որ քվեարկեր պատգամավորների 2/3-ը` 367 պատգամավոր:
Ստեղծված իրավիճակում ՏԻՄ վաղաժամ ընտրություններ անցկացնելու համար սահմանադրական ուղղումների առաջարկը ներկայացվելու է նախագահ Աբդուլլահ Գյուլին, որը գործելու երկու տարբերակ ունի: Նախագահը կա’մ կարող է այդ հարցը դնել հանրաքվեի, կա’մ էլ այն հետ ուղարկել խորհրդարան:
Հիշեցնենք, որ Թուրքիայում ՏԻՄ ընտրությունները պետք է անցկացվեն 2014 թվականի մարտի 29-ին, սակայն Էրդողանը ցանկանում է դրանք անցկացնել 2013 թվականի աշնանը, քանի որ գտնում է, որ նպատակահարմար չէ մեկ տարում երկու ընտրություն անցկացնելը (2014 թվականի օգոստոսին Թուրքիայում անցկացվելու են նախագահական ընտրություններ):
Բացի այդ, Էրդողանի կարծիքով` եթե ՏԻՄ ընտրությունները չանցկացվեն վաղաժամ, ապա ձմեռային պայմաններում շատ դժվար կլինի նախընտրական քարոզարշավ իրականացնել:
