Ռուսաստանի նախագահ Վլադիմիր Պուտինն Անվտանգության խորհրդի օպերատիվ նիստ է հրավիրել՝ ԱԽ մշտական անդամների մասնակցությամբ։ Այս մասին, ըստ rbc.ru–ի, հայտնում է Կրեմլի մամլո ծառայությունը։
«Խորհրդակցության ընթացքում քննարկվել են օրակարգի սոցիալ-տնտեսական ընթացիկ հարցերն ու միջազգային իրադրությունը` Սիրիայում իրավիճակի վրա շեշտադրությամբ»,- ասված է հաղորդագրության մեջ: Նիստի այլ մանրամասներ մամլո ծառայությունը չի հայտնում:
ՌԴ ԱԽ նիստին մասնակցել են վարչապետ Դմիտրի Մեդվեդևը, Դաշնության Խորհրդի նախագահ Վալենտինա Մատվիենկոն, Պետդումայի խոսնակ Սերգեյ Նարիշկինը, նախագահի աշխատակազմի ղեկավար Սերգեյ Իվանովը, Անվտանգության խորհրդի քարտուղար Նիկոլայ Պատրուշևը, նրա տեղակալ Ռաշիդ Նուրգալիևը, ՆԳՆ ղեկավար Վլադիմիր Կոլոկոլցևը, ԱԳ նախարար Սերգեյ Լավրովը, պաշտպանության նախարար Անատոլի Սերդյուկովը, Անվտանգության դաշնային ծառայության ղեկավար Ալեքսանդր Բորտնիկովը և Անվտանգության խորհրդի մշտական անդամ Բորիս Գռիզլովը:
Իրավիճակը Սիրիայում, որտեղ կես տարուց ավել չեն դադարում կառավարական զորքերի և ընդդիմադիրների միջև բախումները, սրվել է Թուրքիայի հետ հակամարտության պատճառով: Այս երկու երկրների հարաբերություններն օրեցօր վատանում են:
Նախօրեին այս հակամարտության մեջ է ներքաշվել նաև Ռուսաստանը: Հոկտեմբերի 11-ի գիշերը Թուրքիայի ռազմաօդային ուժերը ստիպել են Անկարայում վայրէջք կատարել սիրիական Airbus A320 ինքնաթիռին, որը Մոսկվայից Դամասկոս էր ուղևորվել: Երկար ստուգումից հետո թուրքերն ինքնաթիռում գտել են սարքավորումներ ռադարների համար, որոնք նրանք «ռազմական բեռ» են համարել:
