«Ժառանգություն» և «Ազատ դեմոկրատներ» կուսակցությունների հարաբերությունները ԱԺ «Ժառանգություն» խմբակցության ղեկավար Ռուբեն Հակոբյանն առայժմ նորմալ է որակում: «Հասկանում եմ, որ հետաքրքրություն կա, ինտրիգա կա, բայց ուռճացվում է: Այն, որ եղել է պայմանավորվածություն, Րաֆֆի Հովհաննիսյանը փաստն է արձանագրում, իսկ բոլոր ձևակերպումները կտրվեն հոկեմբերի 21-ին, երբ ունենանք վարչության և խմբակցության ընդլայնված նիստ»,- «Երկիր Մեդիա» հեռուստաընկերության «Երկրի հարցը» հաղորդման այսօրվա եթերում հայտարարել է Ռուբեն Հակոբյանը՝ վստահություն հայտնելով, որ մինչև հոկտեմբերի 21-ը շատ հարցեր կքննարկվեն և ամեն ինչ լավ ավարտ կունենա: Ռ. Հակոբյանը հրաժարվել է հարցն առավել մանրամասնել՝ նշելով, որ Հայաստանուոմ այսօր շատ ավելի լուրջ գործընթացներ են, և «Ժառանգության» ու «Ազատ Դեմոկրատների» հարաբերությունները հարցերի հարցը չեն: Այնուամենայնիվ, նա նշել է, որ Րաֆֆի Հովհաննիսյանն այն գործիչը չէր, որ ասեր չեղած բանի մասին:
Անդրադառնալով ԲՀԿ անդամ Վարդան Օսկանյանի նկատմամբ քրեական գործ հարուցելու և պատգամավորական անձեռնմխելիությունից զրկելու թեմային՝ Ռ. Հակոբյանն ասել է. «Ո՞ւմ մտքով է անցել այս պահին, երբ ունենք հազար ու մի պրոբլեմներ, երբ Վարդան Օսկանյանը դիտվում է նախագահի թեկնածու, նման հարցով մտնել խորհրդարան: Չեմ հասկանում: Սա մի այլ տեղ ծնված գաղափար է, որ մեր պետության, իշխանության շահից չի բխում: Սա արջի ծառայություն է մարդկանց, թե՝ տեսեք՝ կարող ենք չեզոքացնել»:
Ռուբեն Հակոբյանը չի բացառել, որ ԵԽԽՎ-ն նոր բանաձևեր կկիրառի Հայաստանի նկատմամբ, ապա ճնշումներ կգործադրեն և նոր արձանագրություններ կպարտադրեն՝ հայ-թուրքական արձանագրությունների նմանությամբ:
«Ժառանգություն» խմբակցության ղեկավարը համարում է, որ Վարդան Օսկանյանը ՀՀԿ-ի և ԲՀԿ-ի միջև ձևավորված խաղի կանոնների զոհ դարձավ: Օսկանյանը, ըստ նրա, այդ կուսակցության «քաղաքական ստորագրություն ունեցողներից է»:
Ինչ վերաբերում է թեմայի շուրջ ԱՄՆ դեսպանի հայտարարություն-մտահոգությանը, Ռուբեն Հակոբյանը նշել է, որ հարցը շահարկվում է և՝ ի հաշիվ մեր պետականության. «Շատ ենք բացել մեր խոհանոցը, և բոլորը մտնում են ներս: Սովորաբար, ովքեր խոսում են մեր պետության մեջ նման մերժելի երևույթների մասին, հետագայում ունենում ենք ծանր հարվածներ»:
Ռ. Հակոբյանն անդրադարձել է նաև վերջին օրերին տարբեր գերատեսչություններում հայտնաբերվող խախտումներին և կոռուպցիայի դեմ կառավարության պայքարի նոր դրսևորումներին՝ նշելով, որ առայժմ հասցեականություն չի երևում: Նա հույս է հայտնել, որ այն շարունակություն կունենա՝ միաժամանակ կասկած հայտնելով, թե իշխանությունը մինչև այս նախընտրական շրջանը չգիտեր նման երևույթների առկայության մասին:
