ՀՀԿ-ական պատգամավոր Լեռնիկ Ալեքսանյանը այսօր Սոչիում կայանալիք Սարգսյան-Մեդվեդև-Ալիև հանդիպումից դրական ակնկալիքներ ունի:
«Գոնե սառույցը տեղից կշարժվի և բանակցություններ կսկսվեն, որովհետև ինչքան ես տեղյակ եմ, հիմքում կդրվի Աստանայում ընդունված փաթեթը, որն ավելի դրական է, քան Մադրիդյան սկզբունքները»,- ասաց Ալեքսանյանը` հավելելով, որ մեծ ակնկալիքներ չկան:
Անդրադառնալով այն հանգամանքին, որ երեկ նորից հրադադարի ռեժիմի խախտում է եղել և հայ զինծառայող է մահացել, Ալեքսանյանը նշեց, որ նման բան նախագահների հանդիպումից առաջ միշտ լինում է, և այդ գործողությունները որակեց, որպես շանտաժ:
«Ադրբեջանցիները ցույց են տալիս, որ այդկերպ աջակցում են իրենց ղեկավարին, որ իրենց ղեկավարի դիրքերը բանակցությունների ժամանակ ավելի ամուր լինեն»,- եզրակացրեց պատգամավորը