Ղազախստանի նախագահ Նուրսուլթան Նազարբաևը, ելույթ ունենալով Ղազախստանի կանանց առաջին համաժողովի ժամանակ, խոսել է նրանց ծախսերի մասին. «Ուզում եմ պետական գաղտնիք բացել, ինչպես ինձ զեկուցել է տնտեսական զարգացման և առևտրի նախարարը, մեր կանայք իրենց վրա ավելի շատ գումար են ծախսում, քան երկրի բոլոր պաշտպանական ծախսերն են», Նազարբաևի խոսքն է մեջբերում Интерфакс գործակալությունը:
Անցյալ տարվա մարտի տվյալներով, 2009թ.-ին Ղազախստանի պաշտպանական ծախսերը կազմել են 1.49 մլրդ դոլար, իսկ 2010թ.-ին նախատեսվում էր ծախսել 1.152 մլրդ դոլար:
Միևնույն ժամանակ, Ղազախստանի նախագահը նշել է, որ «կանայք ապահովում են երկրի ՀՆԱ-ի մոտ 40%, և այդ մասնաբաժինն անընդհատ աճում է»:
Այդուհանդերձ, ըստ Նազարբաևի, կանայք գրեթե չեն առաջադրվում ղեկավար մարմիններում, և այդ կապակցությամբ նա կառավարությանը հանձնարարել է մինչև 2016թ.-ը ծրագիր մշակել որոշումների կայացման հարցում կանանց դերակատարությունը մեծացնելու ուղղությամբ:
Նազարբաևը կանանց նաև կոչ է արել մասնակցել պետական ընկերությունների սեփականաշնորհման գործընթացին: Գալիք երեք տարիների ընթացքում Ղազախստանի իշխանությունները պետք է անցկացնեն մի քանի խոշոր ազգային ընկերությունների սեփականաշնորհում, որոնց թվում են «Կազմունայգազ» ընկերությունը, որը կառավարում է երկրի KEGOC էլեկտրացանցերը, երկաթուղային և արդյունաբերական մի շարք խոշոր ընկերություններ:
