Վերջին շաբաթների զարգացումները Լիբիայում և դրա շուրջ ձևավորված տեղեկատվական դաշտը կարելի է մեկ բառով բնութագրել` քաոս:
Այսօր առավոտյան միանգամից մի քանի աղբյուր հայտնել են, որ Լիբիայի առաջնորդ Մուամար Քադաֆիի կողմնակիցները և աֆրիկյան վարձկանները գրավել են Տրիպոլիից 50 կմ հեռավորության վրա գտնվող Ալ-Զաուիյա քաղաքը, որը հակակառավարական դիմադրության հիմնական կետերից մեկն էր: Սակայն Al-Jazeera-ն իր հերթին տեղեկացնում է, որ այդ քաղաքի համար մարտերը շարունակվում են, և կողմերից ոչ մեկը չունի առավելություն: Նաև հայտնվում է մի քանի տասնյակ զոհերի մասին:
Associated Press գործակալության փոխանցմամբ, Լիբիայի երկրորդ քաղաքում տեղի ունեցած պայթյունի հետևանքով զոհվել է մոտ 20 մարդ: Նախնական տվյալներով, ապստամբների ձեռքում գտնվող այդ քաղաքում պայթել է զենքի պահեստներից մեկը, սակայն հայտնի չէ` պայթյունը դիվերսիա՞ է, թե՞ ուղղակի անզգուշության հետևանք:
Reuters-ի փոխանցմամբ, Քադաֆիի կողմնակիցներին հաջողվել է վերականգնել վերահսկողությունը Ռաս Լանուֆ նավահանգստում, որտեղից արտահանվում է լիբիական նավթի մի մասը:
Ամերիկյան Renesys գործակալությունը հայտնել է, որ Լիբիայում ընդհատվել է ինտերնետ կապը: Երկրի գրեթե ողջ տարածքում ոչ մի կայք հասանելի չէ. սա նշանակում է, որ Քադաֆին պատրաստվում է նոր լայնամասշտաբ հարձակում սկսել հակակառավարական ուժերի դեմ, ինչի համար անհրաժեշտ է ապահովել տեղեկատվական շրջափակում: