«Լրագրություն և բիզնես» թեմայի շուրջ այսօր լրագրողների հետ հանդիպման ժամանակ խոսեցին «Ռոյթերս» միջազգային մուլտիմեդիոն լրատվական գործակալության խմբագիր-թրեյներ Թոմաս Ատկինսն ու Եվրոպայի, Կենտրոնական Ասիայի և Աֆրիկայի ֆինանսական շուկաների մասնագետ Նայջել Ստեֆենսոնը:
Նրանք վերջին չորս օրերի ընթացքում հայ լրագրողների շրջանում դասընթացներ են կազմակերպել, բացատրել ֆինանսական լրագրության կարևորությունն ու նշանակությունը: Նայջել Ստեֆենսոնն ասաց, որ Հայաստանում փորձել են լրագրողներին, ովքեր հետաքրքրված են ֆինանսական և բիզնես լրատվությամբ, ներկայացնել այն հմտությունները, այն տեխնիկան, որը կարելի է կիրառել ֆինանսական լրագրության մեջ:
«Ռոյթերս» միջազգային մուլտիմեդիոն լրատվական գործակալության խմբագիր-թրեյներ Թոմաս Ատկինսն ասաց, թե փորձել են դասընթացների ընթացքում ցույց տալ, որ ֆինանսական լրագրությունն առնչվում է և՛ բիզնեսին, և՛ մարդուն, և՛ տնտեսությանը, կիսել են իրենց փորձը, որը ձեռք են բերել աշխատանքի ընթացքում:
«Եթե ամփոփեմ կարևոր մեսիջները, որոնք փոխանցել ենք, ապա դա ֆինանսական լրագրողի ճշտապահությունն է, անկախությունը, անկողմնակալությունը և հավասարակշռությունն ու արդարությունը:
Հարցին, թե ինչպե՞ս են գնահատում Հայաստանում ֆինանսական լրագրության մակարդակը, նրանք պատասխանեցին, որ իրավասու չեն գնահատել տնտեսական լրագրությունը Հայաստանում, քանի որ ընդամենը մի քանի օր է՝ այստեղ են: Սակայն, Ատկինսի խոսքերով, լրագրողները ամեն երկրում միևնույն խնդիրներին են բախվում: Նրա համոզմամբ՝ այս ոլորտն ամենաշատ մրցակցային և արագ զարգացող ոլորտներից մեկն է, ուստի ցանկացած լրագրողի խնդիրն է մասնագիտանալ թեմայի մեջ և գտնել այն, ինչ իրեն է պետք:
Նայջել Ստեֆենսոնն իր կոլեգայի խոսքին հավելեց, որ տնտեսական լրագրությունն այն մասնագիտությունն է, որում պետք է անընդհատ պայքարել, խորանալ ու խորանալ, որպեսզի կարողանաս ճիշտ տեղեկատվություն ստանալ և ցանկալի արդյունքի հասնել, տարբերություն չկա՝ գտնվում եք Հայաստանո՞ւմ, թե ուրիշ տեղ: Նա առանձնացրեց մի դժվարություն, որը ֆիքսել են. դա այն է, որ լրագրողները Հայաստանում ունեն աղբյուրի խնդիր: Նայջել Ստեֆենսոնի դիտարկումներով՝ նման խնդիր ունեն ամբողջ աշխարհում աշխատող լրագրողները:
