Ամերիկյան մամուլին մանրամասներ են հայտնի դարձել Թոմ Քրուզի ու Քեթի Հոլմսի ամուսնալուծության գործընթացից: Պարզվել է, որ նրանց միությունը «դատապարտված էր պաշտոնական բաժանումից դեռ 6 ամիս առաջ», գրում է Radar Online-ը:
Համաձայն 2012թ. օգոստոսի 17-ով թվագրված փաստաթղթերի, որոնք ստորագրել է Նյու Յորք նահանգի Գերագույն դատարանի դատավոր Մեթյու Կուպերը, ամուսնական զույգը դադարել էր գոյություն ունենալ մինչև ամռանը ամուսնալուծության մասին պաշտոնապես հայտարարելը:
Հանրության ուշադրությանն են ներկայացվել նախկին ամուսինների համատեղ երեխայի՝ Սուրիի դաստիարակությանը ու ալիմենտներին վերաբերող նոր մանրամասներ: Դրանց համաձայն՝ Քրուզը մինչև դստեր 18 տարին լրանալը պարտավոր է վճարել նրա «բժշկական ու ատամնաբուժական սպասարկման վճարները, ապահովագրությունը, ուսման ու քոլեջի վարձը»՝ տարեկան 400 հազար դոլար:
Ընդ որում, ինչպես նկատում են լրագրողները, նման վճարումներն առանձնապես մեծ վնաս չեն պատճառի դերասանի 250-միլիոնանոց կարողությանը:
Մինչ այդ հրապարակվել էին հոլիվուդյան հայտնի ամուսնական զույգի գաղտնի հարսանիքին վերաբերող փաստաթղթեր: Պարզվել է, որ չնայած 2006թ. նոյեմբերի 18-ին իտալական Բրաչչանո քաղաքի Օդեսկալկի դղյակում կայացած հանդիսավոր արարողությանը, իրականում Հոլմսն ու Քրուզը իրենց քաղաքացիական ամուսնությունը նույն ամսին գրանցել են Լոս Անջելեսում: Իսկ նրանց ամուսնական պայմանագիրը ստորագրվել է հանդիսությունից մի քանի ամիս առաջ:
Քեթի Հոլմսը ամուսնալուծության հայտ էր ներկայացրել այս տարվա հունիսին՝ իր որոշումը հիմնավորելով «անհամատեղելի հակասություններ» արտահայտությամբ: Սակայն նրանց մերձավոր շրջապատն ասում է, որ պատճառը սայենտոլոգիան է, որի մեջ գլխովին թաղված է Քրուզը:
