Ադրբեջանական Trend լրատվական գործակալության փոխանցմամբ՝ հոկտեմբերի 1-ին Վրաստանում անցկացված խորհրդարանական ընտրությունների նախնական արդյունքներով՝ երկրի խորհրդարանում ներկայացված է լինելու 7 կուսակցություն: Այս մասին հայտարարել է Վրաստանի Կենտրոնական ընտրական հանձնաժողովը (ԿԸՀ):
Վերջինիս հաղորդմամբ՝ այդ 7 կուսակցություններից մեկը ընտրություններից առաջ իշխող «Միասնական ազգային շարժում» կուսակցությունն է, իսկ մնացյալ 6-ը մտնում են «Վրացական երազանք» դաշինքի մեջ. «Վրացական երազանք – ժողովրդավարական Վրաստան» կուսակցություն (նախագահ՝ Մանանա Կոբախիձե), «Պահպանողական» կուսակցություն (Զվիադ Ձիձիգուրի), «Արդյունաբերությունը կփրկի Վրաստանը» կուսակցություն (Գոգի Տոպաձե), «Հանրապետական» կուսակցություն (Դավիթ Ուսուպաշվիլի), «Մեր Վրաստան – Ազատ դեմոկրատներ» կուսակցություն (Իրակլի Ալասանիա), «Ազգային ֆորում» կուսակցություն (Շարտավա):
Նախնական տվյալներով՝ «Վրացական երազանք» դաշինքի մեջ մտնող կուսակցությունները խորհրդարանում կձևավորեն 3 խմբակցություն:
