ԱՄՆ պետքարտուղար Հիլարի Քլինթոնը հայտարարել է, որ այլևս վտանգավոր է կրճատել արտաքին քաղաքական գերատեսչության բյուջեն, քանի որ Վաշինգտոնը պարտվում է տեղեկատվական պատերազմում: Այս մասին գրել է The Washington Post-ը:
Այս մասին նա հայտարարել է Սենատի միջազգային հարաբերությունների հանձնաժողովում անցկացված լսումների ժամանակ: Լսումները նվիրված էին 2012 թ. պետական բյուջեով պետքարտուղարությանը հատկացվելիք 47 մլրդ դոլարի հարցին:
«Մենք գտնվում ենք տեղեկատվական պատերազմի մեջ և այդ պատերազմը պարտվում ենք»,- ասել է պետքարտուղարը` փորձելով փարատել հատկացվելիք գումարների նպատակահարամարության հետ կապված՝ սենատորների ունեցած կասկածները:
Քլինթոնն ասել է, որ «Սառը պատերազմից» հետո ԱՄՆ-ն սկսեց տեղեկատվական պատերազմում պարտվել այլ խաղացողների: Նա բերել է քաթարյան Al-Jazeera, չինական CCTV և ռուսական անգլիալեզու Russia Today հեռուստաալիքների օրինակները, որոնք հաջողված է համարել:
Չնայած այն փաստին, որ հոլիվուդյան ֆիլմերը շարունակում են գերիշխող դեր ունենալ շուկայում, սակայն տեղեկատվության տարածման համար դրանք լավագույն միջոցը չեն և հանգեցնում են իրականության խեղաթյուրմանը:
Չնայած ինտերնետ նախագծերին հատկացվող 30 մլն դոլարին, Քլինթոնը դա բավարար չի համարում, քանի որ մարդկանց մեծ մասը հեռուստատեսությունից և ռադիոյից են շարունակում լրատվություն ստանալ: