Սիրիայի նախագահ Բաշար Ասադը մերժել է երկրի ղեկավարության ներկայացուցիչների` ընդդիմության հետ բանակցություններ սկսելու խնդրանքը: Այս մասին հայտնել է Սիրիայի նախկին վարչապետ Ռիադ Հիջաբը, ով 2012-ի օգոստոսին փախել էր Հորդանան, փոխանցում է Al-Arabiya հեռուսատաալիքը:
Հիջաբի խոսքով` ինքը փոխվարչապետ Ֆարուք ալ- Շարաայի և մի քանի այլ բարձրաստիճան պետական և կուսակցական գործիչների հետ փորձել է ազդել Ասադի վրա` ընդդիմության հետ խաղաղ բանակցություններ նախաձեռնելու համար: Սակայն նրանց ջանքերն իզուր են եղել Դամասկոսում ահաբեկչությունից հետո, որի հետևանքով զոհվել են Սիրիայի պաշտպանության նախարար Դաուդ Ռաջհան, նրա տեղակալը և Բ. Ասադի աներորդի Ասեֆ Շաուկատը:
Նախկին վարչապետը միաջազգային հանրությանը կոչ է արել բոլոր հնարավոր միջոցներով օգնել ընդդիմադիրներին:
«Այս հեղափոխությանը պետք է օգնել բոլոր ուժերով և միջոցներով: Սիրիայի ժողովրդի աղետն ու տառապանքները պետք է վերջանան: Խնդրի լուծումը Սիրիայի սահմաններում է: Նրա որդիներն ու դուստրերը լիովին կարող են հասնել դրան: վարչակարգն ընդամենը ՄԱԿ-ի միջնորդների հետ բանակցելով` ժամանակ է գնում: Ես ինքս եմ դա լսել Բ. Ասադից` չի լինի հակամարտության խաղաղ կարգավորում, հատկապես` ընդդիմության և Սիրիական ազատ բանակի գործողությունների լույսի ներքո»,- հայտարարել է Հիջաբը:
Հիշեցնենք, որ Հիջաբն ընդդիմադիրների կողմն է անցել օգոստոսի 6-ին: Նա մուսուլման-սուննի է, որոնք Սիրիայի ընդդիմության միջուկն են:
Սիրիայում ընդդիմության և կառավարության միջև բախումները սկսվել են 2011 թ. մարտից: Այդ ընթացքում, տարբեր տեղեկությունների համաձայն, մոտ 30 հազար մարդ է զոհվել:
