Գերմանական միասնության օրվան նվիրված Bild թերթի անցկացրած հարցման համաձայն` նախկին ԳԴՀ և Արևմտյան Բեռլինի բնակիչների միջև պահպանվում են էական տարբերություններ: Հարցման մասնակիցների 36%-ի կարծիքով` արևմտյան գերմանացիներին բնորոշ է փողամոլությունը:
Արևելյան գերմանացիներին, որոնց անվանում են նաև «Օսսի», բնորոշ է կյանքի հանդեպ չբավարարվածության զգացումը (հարցման մասնակիցների 37%), հնազանդություն իշխանություններին (29%), նախանձություն (30%): Համանման բնավորության գծերն ավելի քիչ են հանդիպում «Վեսսի»-ի, այսինքն՝ Արևմտյան Գերմանիայի բնակիչների մոտ:
Ընդհանուր առմամբ հարցման մասնակիցների 74%-ը ենթադրում է, որ նոր և հին դաշնային հողերի բնակիչների մոտ պահպանվում են տարբերություններ մենթալիտետում: Դրա հետ մեկտեղ յուրաքանչյուր հինգերորդ «Վեսսի» երբեք չի եղել Արևելյան Գերմանիայում, իսկ 9% «Օսսի» երբեք չի եղել երկրի արևմուտքում:
Սեպտեմբերի 28-ից հոկտեմբերի 1-ն անցկացրած հարցմանը մասնակցել են Արևելյան և Արևմտյան Գերմանիայի 1005 բնակիչ:
Գերմանական միասնության օրը Գերմանիայում նշվում է հոկտեմբերի 3-ին: 1990թ. այդ օրը պաշտոնապես միավորվեցին ԳՖՀ-ը , ԳԴՀ-ը և Արևմտյան Բեռլինը:
Չնայած անցել է 22 տարի, սակայն նախկին արևելյան հողերը հետ են մնում արևմտյան հողերից նաև տնտեսական չափանիշներով:
