ՀԱԿ-ը օրերս հանդես է եկել ԱԺ-ում 2008 թվականի մարտի 1-ի դեպքերն ուսումնասիրող նոր ժամանակավոր հանձնաժողով ստեղծելու առաջարկությամբ: Այդ կապակցությամբ մարդու իրավունքների պաշտպան Կարեն Անդրեասյանը «Առաջին լրատվական»-ի հետ զրույցում նշեց, որ կողմ է, որպեսզի ԱԺ-ում լինեն ժամանակավոր հանձնաժողովներ՝ կապված այնպիսի խնդիրների հետ, որոնք իրավաքաղաքական են. «Այն դեպքում, երբ իրավական լուծումները բավարար չեն լինում կամ էլ հանրային անվստահության որոշակի տարրերի պատճառ են դառնում, այդ ժամանակ է, որ անհրաժեշտություն է լինում քաղաքական լուծումներով խնդրին մոտենալ (նման օրինակ է նաև զինծառայողների մահվան դեպքերը, երբ ծնողները պահանջում են ժամանակավոր հանձնաժողով): Ուստի ժամանակավոր հանձնաժողովները ԱԺ-ում, որոնք պետք է բացահայտեն կամ որոշակի ուսումնասիրություն անցկացնեն՝ ըստ այդմ վերականգնելով հանրային վստահությունը իրավական հարցերի վերաբերյալ, կարող են շատ օգտակար լինել»:
Իսկ ՄԻՊ-ը կմիանա՞ արդյոք այդ հանձնաժողովին՝ հարցին պարոն Անդրեասյանը պատասխանեց, որ ինքը չունի նման լիազորություն, բայց առաջարկության դեպքում պատրաստակամ կլինի. «Ես չունեմ լիազորություն և իրավասություն նման գործընթացներում աջակցությամբ հանդես գալու: Ժամանակին, երբ ես առաջարկում էի լինել միջնորդ իշխանության և ընդդիմության միջև, որպեսզի լինի օբյեկտիվ ուսումնասիրություն մարտիմեկյան դեպքերի, այդ ժամանակ ասվեց, որ մարդու իրավունքների պաշտպանի անհրաժեշտություն իրենք չունեն: Այնուհանդերձ, եթե իրենք ցանկանան ինձ էլ ներգրավել նման գործընթացներում՝ ես պատրաստակամ կլինեմ»:
