Կինոարվեստի ամերիկյան ակադեմիան այսօր հայտարարել է հոբելյանական 85-րդ «Օսկարի» հանձնման արարողության հաղորդավարին: Այդ պատասխանատու գործը հանձնվել է կատակերգու, սցենարիստ և ռեժիսոր Սեթ Մակֆարլեյնին:
Վերջինս հայտնի է մասնավորապես «Family Guy» և «American Dad» մուլտսերիալներով, ինչպես նաև «Ted» կինոկատակերգությամբ:
«Ինձ համար մեծ պատիվ է արժանանալ արարողությունը վարելու հրավերն ստանալուն: Ես կանեմ հնարավոր ամեն ինչ սպասումներն արդարացնելու և բարձր չափանիշներին համպատասխան աշխատանք անելու համար»,- նշել է Մակֆարլեյնը:
Արարողության պրոդյուսերներ` Քրեյգ Զադանը և Նիլ Մերոնը ևս ողջունել են ակադեմիկոսների որոշումը. «Մենք վստահ ենք, որ Սեթի վարպետությունը և մեր գաղափարները հիանալի կերպով կդրսևորվեն համատեղ աշխատանքի արդյունքում»,- հայտարարել է Զադանը:
«Օսկարի» հավակնորդների անունները նշվելու են եկող տարվա հունվարի 10-ին ակադեմիայի ներսում տեղակայաված «Սեմուել Գոլդուին» թատրոնում:
Մրցանակակիրների անունները հայտարարվելու են 2013 թ փետրվարի 24-ին Լոս Անջելեսի «Դոլբի» (նախկինում՝ «Կոդակ») թատրոնում:
